SHILLONG: Meghalaya a·doko niam gri napsrukbae songdong a·chaaniko champengna gita a·dokni pilak cholgugarangon entry aro exit point-rangko donchina dingtang dingtang dolrang dabitokengon, entry-exit point-rangko donaniode maming neng·nikanirang dongja indiba niamrangko ja·rikna gitasa cholrang dongkujani gimin Meghalaya Residents Safety & Security Act (MRSSA)-ko taridapna man·ahaode, entry-exit point-rangkoba chalaina man·aigen ine Sombar salo, a·dokni Chief Minister Conrad K Sangma parakataha.
Entry-exit point-rangni pal food court-rangkosa kulina miksongenga ine dingtang dingtang dolrangni matnanganirangna Umpling-o tourist registration centre-ko kulina a·dokni Tourism Minister Timothy D Shira-ni parakatani ja·man ia kattarangko Chief Minister aganaha.
“Entry-exit point-rangko kulianiode sorkari maming neng·nikani dongjawa aro iakode da·al ba knalba kulina man·aigen. Indiba ra·bianide, niamko ra·gatanisa ong·enga aro gipin biaprangoni re·baenggipa manderangko nirokanio, niamrangko ja·rikna man·na nanggen,” ine Sangma aganaha.
MRSSA-ko taridapna man·ahaode, a·dokni pilak cholgugarangon entry-exit point-rangko done, re·ruraenggipa manderangko nambate nirokna man·gnok ineba Chief Minister, an·tangni ka·dongchakenganiko parakataha.
“Gate-rangko songaniode maming neng·nikani dongjawa indiba mai niamo pangchake, gipin biaprangoni re·baenggipa manderangko nirokgen ba champenggen, uasa nangbatgipade ong·enga. Entry-exit point-rangko donenba, uano manderangko asongatmangmangaiachide ia neng·nikaniko namatna man·jawa,” ine Sangma aganaha.
Registration centre-ko nanga ine Tourism Minister-ni agangipa kattarangna chakpaaniko parakatengon, ia pilak kamrangnan niamkoba nanggen ine Chief Minister aganskaaha.
MRSSA-ko taridapanichi entry-exit point-rangko chalaina man·gen: CM
Date:
Share post:
