TURA: Ru·uta bilsirangoni A·chik jatni dabibaenggipa Garo Hills Autonomous District Council (GHADC)-o dakna nanggnirangko chu·sokate on·china Sombaro Garo Hills-ni doldok NGO-rang jedake Association for Democracy and Empowerment (ADE), A·chik Holistic and Awakening Movement (AHAM), A·chik Youth Welfare Organisation (AYWO), Federation for A·chik Freedom (FAF), Federation of Khasi Jaintia and Garo People (FKJGP), aro Garo Students’ Union (GSU) GHADC-ni Chief Executive Member(CEM), Dhormonath Ch Sangmako gronge didianiko on·aha.
GHADC-o Service Rule dongjani a·sel niamgri kamna ripnapanirang, niamgri kam ra·doanirang ong·engani gimin re·baenggipa GHADC-ni session-o Service Rule-ko pass ka·e Governor-na watatchina, Garo Hills-ni pilak biaprangoni aro ning·tugipa biaprangoni GHADC-na gamna nanganirangko gamna gita Tura-ona re·bana nangengani gimin altubate online gamna man·na gita Digitalized dakchina, Sixth Schedule-ara dingtangmancha atchikapgipa Tribal-rangni a·ko-chiko daka-rikaniko ripingna on·gipa ong·ani gimin GHADC-o Separate Electoral Roll-ko ra·gatchina, aro A·chik jatni dakbewalrangara dingtangmanchagipa ong·ani gimin mikkangchina jatni dakbewalrangko ripingangkuna man·a gita Garo Customary Law (GCL)-ko ta·raken niamona ra·bachina gita uamangni on·gipa memorandum-o janapangaha.
GCL-ko bimang ong·atchina gita ru·uta bilsirangonin, GHADC election-ko champengpile dabibaaniko dakbaahachim indiba da·alona kingking bimang ong·atkuja, unigimin iako ta·rakgen bimang ong·atchina gita ADE dolni dilgipa Dalseng Bira Ch Momin, CEM-ko didiaha. Indake ong·genchimoba GHADC election-o susana gita ST Certificate-ko nangchongmotgipa dakatna man·ahanina ua kusi ong·chakanikoba parakaha.
Da·alo chingni dabianirangko bimang ong·atjana kingkingde chinga jrip dongjawa aro rakbate dabiangkugen. Unigimin A·chik jat arop songsalni namgnina uamangni NGO-rangni dabianirangko chu·sokate on·china gita ADE dilgipa mol·mole aganaha.
GHADC-o jatni nangnikanirangko chu·sokate on·china NGO-rang dabia
Date:
Share post:
