Tripartite Agreement Review Team sorkarini ku·rachakgimin project-rangko nirokanga

RESUBELPARA: Garo Hills ni bako namroro-silroroaniko ra·bana gita a·dok sorkari, ma·mong sorkari, aro ANVC, ANVC (B) ni gisepo Tripartite Agreement ko songgigrike soi ka·angenba A·chik a·songko namdap-sildapatna chamatgimin tangka-paisarangchi North Garo Hills ni bako sorkarini chu·sokatna nanggipa kamrang baditana chu·sokengahachim, uarangko Tripartite Agreement Review Team-  Bernard N. Marak aro songgigrikanio soi ka·gipa gipin member-rang baksana a·jani Assistant Deputy Commissioner-ni dongpaanio Bristibar salo nirokangaha. North Garo Hills a·jao Tripartite Agreement-o pangchake songsalo songdonggipa sakantina nangchongmotgipa Resubelpara Community Health Centre (CHC) aro Mendipathar Community College-rangko nirokangaha.
Review Team-ni parakatani gita Tripartite Agreement-o songgigrikanichi North Garo Hills-ona agreba Garo Hills-ni gipin bakrangoba lekka-poraniko, sanna-bananiko  namdapataha, aro songdonggipa manderangna jakkaltogipa gipin gipin nanganirangko chu·sokatna man·engako janapaha. Tripartite Agreement-ni ning·o janapgimin gita North Garo Hills aro South West Garo Hills-ni bako Sub-Division aro Development Block ning·o sason ka·ani bidingo aro sorkarini kam ka·anirang nambataniko nikangna man·aha.
Iarangna agreba Tripartite Agreement ni paragraph 6.2-o pangchake chadamberangna chugipa gadango skie ra·na cholko on·na gita Captain Williamson Sangma State University; Engineering College; Medical College; Nursing College; Horticulture College; aro Architecture College rangko matchotatna kamrangko ka·genoba songo-noko primary skulrangko nambatatna mikkango donna nanga ine talatanga.
Iani gisepon Mendipathar Community College-ko nirokangaon ua college ko rikanio kragipa bosturangko jakkalgija rika baksana bang·gija chadamberangkosan nokchakna man·gipa skie ra·chakram ong·a aro chu·onga gita skigiparang dongkujani a·sel a·jao ge·samangmang college dongpae chadamberangna chu·ongjae mitam chadamberangko a·palona ong·kate poraina draatenga ine suk ong·gijaniko parakenba ia college ko dal·dapatna, skie on·gipako aro gipin kamrango dangdike on·gipako rimdapchina Review Team dabiaha.
Salgro-jolosan ong·aigija Resubelpara, Bajengdoba, aro Kharkutta joloba Community College-rangko kulie on·e Kharkutta songjinmako chu·gimik Sub-Division dake ra·gatchina gitaba dabianga. Minggipin Resubelpara CHC ko nirokangaon uno dangdike on·enggiparang komianiko nikna man·aha jean songjinmao bang·bea manderangni saa-ding·aniko nirokna gita chu·onggipa ong·ja ine aganaha.
Iarangna agreba bang·bata Development Block-rangon Gram Sevak donggijasa kam ka·atani a·sel songadamnni bang·bata bakrangon namroro-silroroaniko ja·man chakataenganina post-rangko nakatate kragipa manderangko rimnapchina dabiaha.