Ramako tarina tender on·engaha ine official-rang a·kanga
MENDIPATHAR: East Garo Hills a·jani Songsak-oni North Garo Hills a·jani Mendipathar-ona kilometer 40-mang ong·gipa rama namsrangjahani a·sel, salanti re·rurana nangenggipa aro jolo songdongenggipa manderang neng·nikanirangko chagrongna nangtokenga ine u·iataha.
Ia ramako, gitcham Congress sorkarini somoion German Technology-chi tariahachim indiba da·o ia ramani obosta namsrangjahani a·sel songre songgabatenggipa manderang aro jolo songdongenggipa manderang neng·nikanirangko chagrongna nangenga ine kobor on·timgiparang u·iataha.
Ia rama da·o namsrangjahani a·sel wachini somoirangode namen rimilan baksana chibolrara dakenga aro a·ran karini somoirangode a·dimurara dake songre songgabatenggipa manderangna aro jolo songdongenggipa manderangnaba neng·nikanirangkoa on·enga.
Jolo songdongenggipa manderangni badi ka·ani ja·man ia ramako aditade tariahachim indiba taria matchotkujamitingon ia rama gita dal·dalgipa truck garirang re·ruraani a·sel ia rama ta·raken nosto ong·piltaiaha ine kobor on·timgiparang u·iataha.
Ia rama gita koela salgipa truck garirang, salantian re·rurae, re·anggipa bilsioni ia rama namjabatna a·bachengaha ineba kobor on·timgiparang parakataha.
Ia ramani bang·bata bakrangon da·o a·kolrara dakahani gimin mikkarang waahaode, chiblokrara dake, gari gorarangnasan ong·aigija ja·achi re·ruraenggipa manderangnaba kenchakna nangani ong·enga ine u·iataha.
“Ia rama da·o obosta dongsrangjahani a·sel ja·achi re·giparangnaba kenchakna nangani ong·enga. Skangode ia ramako re·ruraanio kontasamangsan nangaiachim indiba da·ode a·kolrara dakahani a·selan kontagnimang nangskaengaha,” ine Songsak jolo songdongenggipa manderang parakataha.
Ia rama gita koela salgipa garirang re·ruraengani a·sel ramako namjabatatenga ine janapatengon, ia ramao be·na sienggipa dolong damgni donga indiba ia dolongrangko da·onan tarichipkujaenga ine jolo songdongenggipa manderang parakataha.
Ia ramako tariani bidingo sorkari official-rango sing·sandiaton, ia ramako chu·gimik taripilna gita da·o tender on·ani kamrangko ka·engaha ine parakatskaaha. Sorkari official-rangni u·iatani gitade, ia ramako chu·gimik tarina gita kror 150-na baten hisapenga.
