SHILLONG: Union Education Minister Dharmendra Pradhan-ni kam wataniara, jingjengatgipa chatro chatrirangna cheani ong·aha ine agananiko a·dokni Bharatiya Janata Party (BJP) jegalatenba, uni kam wataniara chatro chatrirangni dabie jingjengatahani gimin ong·ja indiba ua an·tangsa, obostarangko nie kamtangko wataha ine parakatskaaha.
Re·anggipa Sonibar salo, Dharmendra Pradhan-ni Education Minister ong·aniko watani ja·man, a·songni dingtang dingtang biaprango aro mongsongbate New Delhi-o chatro chatrirangni sal 36-na jingjengatanikoba dontongahachim ine nikna man·a. NEET porikkao paper leak ong·anina jegale, lekka porani kamrangko namdapatchina aro Union Education Minister Dharmendra Pradhan-ko kam watchina dabie chatro chatrirang jingjengatanirangko dakangahachim.
Indake ong·engon, Pradhan-ni Education Minister ong·aniko wataniara, jingjengatenggipa chatro chatrirangna cheani ong·aha ine agananiko BJP Meghalaya-na ku·wattimgipa Arnab Das jegalatenba, Pradhan an·tangsa obostarangko nie kamtangko wataha ine parakatskaaha.
“Dharmendra Pradhan an·tangsa kamko wataha aro darangni dabie jingjengatani gimin ong·ja. Chatro chatrirangni jingjengataniko chol ra·e a·songni kosako chakatgipa dolrang, ong·gija kamrangko ka·na man·jana gitasa Pradhan, kamtangko wate on·aha,” ine Das parakataha.
Jantar Mantar-o aro a·songni dingtang dingtang biaprango chatro chatrirang aro chadambe dolrang, uamangni jingjengatanichi Education Minister kamtangko watna draatako man·aha ine kusi ong·e manitokengon, chatro chatrirangni jingjengatani aro Education Minister-ni kam watanio maming nangchakeani dongja ine Meghalaya BJP a·kangatskaaha.
Lekka porani kamrangko namdapatna aro porikkarangko parak ong·ani gnang ong·atna gita ma·mong sorkari dingtang dingtang ja·kurangko de·chakataha ineba Meghalaya BJP-na ku·wattimgipa parakataha.
