TURA: West Garo Hills a·jani Gambegre C&RD Block ning·o donggipa adita songrang, jekai Bolori, Dikkimpara, Jebalgre aro uandakgipa gipin songrango bijoliko name man·jaenga ine Sombar salo, A·chik State People’s Front (ASPF) Gambegre regional unit, Meghalaya Power Distribution Corporation Limited (MePDCL) Barengapara, Dalu Sub-Division-ni Sub-Divisional Officer (SDO)-na badi ka·doangaha.
MePDCL Dalu Sub-Division-ni SDO-na sedoatgipa chittio ASPF Gambegre unit-ni parakatani gitade, Gambegre Block-ni ning·o donggipa Bolori, Dikkimpara, Jebalgre aro samba jolrango salantian bijoli changni chang sirongenga aro walni somoirangode chang 10 batpile bijoli sirongengani a·sel songni manderang, neng·nikanirangko chagrongna nangtokenga.
“Ia songrango salsaba bijoliko name man·rongja aro uandaken salni bakoba changni chang bijoli sirongenga. Walni somoirangosa obostarang namjabatronga maina walode chang 10 batpilen bijoli sirongenga,” ine ASPF Gambegre regional unit parakataha.
Ia jolrango bijoli sirongengani a·selan dingtang dingtang kamrangko ka·e cha·enggipa manderang, bading chiwalgiparang aro mongsongbate chatro chatrirang, poraianirango neng·nikanirangko chagrongna nangenga ineba ASPF regional unit parakataha.
“Walni somoirango baditaba kontarangna bijoli sirongengani a·selan chatro chatrirang poraianirango neng·nikanirangko chagrongna nangtokenga aro ian chatro chatrirangni lekka porako ra·anio nangchakeaniko ra·baenga,” ine ASPF regional unit parakatenba, ia jolrango bijoliko nambate on·na gita ta·raken ja·kurangko de·chakatchina MePDCL Dalu Sub-Division-ni SDO-ko didiataha.
Ia jolrango bijoliko nambate on·na maming ja·kurangko de·jagenchimode, jolo songdongenggipa manderang, rakgipa ja·kurangko de·e jingjengatna draatako man·gen ineba ASPF Gambegre regional unit, mikrakataniko on·angaha.
