AMPATI: India a·song gimikon ma·mong sorkarini a·bachengatgipa Khet Bachao Abhiyan-ko South West Garo Hills a·jaoba District Agriculture Office, District Horticulture Office aro ATMA-ni Project Director baksa nangrime, June 1 tarikoni June 30 tarikona ong·atangaha.
South West Garo Hills a·jao ia Khet Bachao Abhiyan-ko gimik dam 10 songrango ong·atangaha aro ia campaign-ni bak gita awareness program, training session aro field demonstration-rangko ong·ate, sak 413 game ge·e cha·giparangna, gama ge·anirangko science-ni bewalo dakna gita skie on·na man·aha.
Ia Khet Bachao Abhiyan-ni bak gita dingtang dingtang songrango program-rangko ong·atanio, gama ge·anio samrangko simsake jakkalna, a·salrangko porikka ra·na, ong·telaigipa a·salrangchi gama ge·anirangko dakna aro Soil Health Management ba a·salrangko nambate tariani bidingo skie on·angaha. Gama ge·anirangko dakanio samrangko komiatchina gitaba official-rang, game ge·e cha·giparangna skie on·angaha.
Ia campaign-ni bak gita game ge·e cha·giparangna tangsekgipa a·salrangko tariani, ong·telaigipa a·salrangko tariani aro uandakgipa kamrangkoba skie on·angaha.
