Electric gariko bregipana gong 25,000 baksana indin register ka·na on·gen
SHILLONG: Meghalaya a·dokni bang·bata biaprangon electric garirangna charging station-rang dongkujaengon, Sombar salo, Meghalaya Cabinet, Electric Vehicle Policy 2026-ko ra·chakangenba, electric gariko bregiparangna sakprako gong 25,000 tangkako on·an baksana gariko register ka·anio nanggipa korosrangkoba watna tik ka·angaha.
Cabinet tom·a matchotani ja·man, iani bidingo kobor ra·timgiparangna u·iatengon, je manderangan electric garirangko bregen, uamangde gariko indin register ka·na man·gen aro unbaksana gong 25,000 tangkakoba man·gen ine a·dokni Cabinet Minister Marcuise N Marak parakataha.
Re·anggipa bilsion Meghalaya sorkari, Scrapping Police-ko ra·gatangahachim aro je manderangan scrapping certificate-rangko ra·anggen, uamangnade tangka paisarangkoba on·na tik ka·angahachim.
Iani bidingo a·dokni Cabinet chanchirimahaoba, tangka paisarangko on·ani giminde ja·mano chanchitaigen ine sorkari u·iataha.
Electric garirangna charge ka·ani biaprang dongkujani gimin sing·on, je biapkoba charging point dake jakkalna man·aigen ine Cabinet Minister Marak aganenba, je biaprangon charging station-rangko rikna siengachim, uandakgipa biaprangko sorkari tik ka·manaha ine parakataha.
Da·o dipet Assam a·dokode scrapping facility dongahani gimin Meghalaya a·dokoba scrapping facility-ko rikna a·dok sorkari krengenga.
