TURA: Mijal Bristibar salni bako Garo Hills Autonomous District Council (GHADC)-ni gital chief executive membor (CEM)-ko seokna gita election-ko ong·atanio National People’s Party (NPP)-ni Benedic R Marak seokako man·aha.
Gital CEM-ko seokna pu·onaniko pring 11:00 bajio a·bachengataha aro ia election-ko GHADC-ni gital Chairman Rakesh A Sangma dilangaha.
Election-ko ong·atanio GHADC-ni sak 28 MDC-rang pu·onangaha, jeon NPP-ni Benedic Marak 16 vote-rangko aro Congress dolni candidate Sadhiarani M Sangma 12 vote-rangko man·rikskaaha.
GHADC-ni gital CEM-ko seokanio BJP dolni MDC Bernard N Marak-ba bakko ra·angaha aro Benedic Marak-ni vote man·aniko nirikede uaba NPP-ni candidate-na pu·onaha ine ma·sina man·aha.
GHADC-ni chairman-ko seokaniode Tura-ni BJP MDC Bernard Marak bakko ra·pajahachim.
CEM-ni kamna susaenggipa MDC sakgni, chong·motan Benedic R Marak aro Congress dolni Sadhiarani M Sangma sakgnian gnigipa changna MDC ong·enggiparang ong·a aro NPP-ni candidate Benedic Marak-de Raksamgre constituency-ni MLA-ba ong·kuengachim.
