U·IATTIMGIPAONI
TURA: Bus aro uandakgipa garirango manderangko salruraenggipa manderang, dingtang dingtang biaprangoni manderangko salrurana nangengani a·sel COVID-19-ko man·ani cholrang bang·batengani gimin West Garo Hills a·jao manderangko salruraenggipa driver-rangnaba COVID-19-ni tikarangko su·na manchiangaha.
West Garo Hills a·jani Deputy Commissioner Ram Singh-ni u·iatani gitade, bus, sumo aro uandakgipa garirangko salruraenggipa manderang, salantian ritchani ritcha manderangko salrurana nangengani a·sel COVID-19-na kenchakna nanganirang ong·engani gimin iandakgipa garirangko salruraenggipa manderangnaba COVID-19-ni tikarangko su·na tik ka·aha.
“Manderangko salruraenggiparang, salantian songreenggipa manderangko salna nangengani gimin chinga uamangnaba tikarangko su·na nangnikaha. Garirango songreenggipa manderangko uamangan mask-rangko ganchina aro saksa sakgipinoni chel·tanggrike asongchina didinaba nangenga,” ine West Garo Hills a·jani DC parakataha.
West Garo Hills a·jaoba Bristibar salmangmangon, bilsi 20 ong·gipa me·chik saksako man·chape gimik sakbri manderang COVID-19-ko man·dapahachim.
Koborko on·ani gitade, ia bilsi 20 ong·gipa me·chik, an·tangni saenggipa pagipa sanna gita bus gario Tura-ona rimbaahachim aro ja·mano uko Tura Civil Hospital-o COVID-19-na Rapid Antigen Test (RAT)-ko ka·on uaba positive ong·ahachim. Ja·mano uko noktango dingtang napate donna gita songtangona rimangpilaha.
Photo: Bus, Sumo aro uandakgipa public transport-rangko chalaienggipa manderang baksa West Garo Hills a·jani official-rang, tom·e chanchirimenga.
