U·IATTIMGIPAONI
SHILLONG: Dingtang dingtang company-rangna MeECL-ni gro nangkuenggipa tangkarangko chotna gita a·dok sorkari, Atma Nirbhar loan-ni gnigipa bakko on·china ma·mong sorkariko didianggen ine a·dokni Chief Minister Conrad K Sangma parakataha.
Chief Minister-ni parakatani gitade, batanggimin bilsi 10-15-mangonin MeECL, dingtang dingtang bijoli company-rangna grorang dongkuengani a·sel neng·nikanirangko chagrongna nangenga aro ia grorangko sorkari Atma Nirbhar loan-chi chotna miksongenga.
“MeECL-ni grorangni bidingo chinga chanchirimaha aro ia grorangko chinga ma·mong sorkarini Atma Nirbhar loan-ko bi·e chotna miksongenga,” ine a·dokni Chief Minister, kobor ra·timgiparangna parakataha.
Bijoli bikotenggipa aro bijoli on·enggipa dingtang dingtang company-rangna MeECL, gong kror 1000-na baten grorang dongkuengachim ine nikna man·a.
“Dingtang dingtang company-rangni grorangko MeECL, somoi gitan gamjringengoba bilsi 10 ba bilsi 15-mangna skangonin grorang dongkuengani a·sel, grorangko chotanio neng·nikanirangko man·enga. Iani giminsa chinga grorangko gamna man·na gita Atma Nirbhar loan-ni gnigipa bakko on·china ma·mong sorkariko didina tik ka·angaha,” ine Chief Minister aganaha.
Chief Minister-ni u·iatani gitade, bijoli bikotenggipa aro bijoli on·enggipa dingtang dingtang company-rangna nangkuenggipa grorangoni bak 50-koba Atma Nirbhar loan-ni skanggipa bakchin gamna man·ahachim.