U·IATTIMGIPAONI
Shillong: A·doko COVID-19 sabisirang ta·raken jelrikrikengani gimin, Shillong songjinma aro uni wilwilao donggipa pilak chu dokkanrangko, hotelrangko aro club-rangko april 23 tarikoni April 3o tarikona chiptokchina gita Deputy Commissioner (Excise), East Khasi Hills District, ge·etaniko on·aha.
Ge·etaniko on·gipao janapani gita, on·gimin niamrangko ja·rikama ja·rikja uko pilak Incident Commander-rang, Zonal Magistrate-rang re·roroe nigen, unigisepon saobarang ia ge·etaniko manijaenga ine nikode Meghalaya Epidemic Diseases, COVID-19 Regulations, 2020-ni ning·o pangchake rakgipa sastiko on·gen ineba mikrakataha.
Shillong Urban Agglomeration-o napgipa biaprangara- Municipal area gimik, Cantonment area gimik, Census Town-rangko man·chape Mawlai C&RD Block-ni ning·o ga·akgipa area-rang Mawpat C&RD Block-ni ning·ogipa Census Town-rangko man·chape, Mylliem C&RD Block-ni ning·o ga·akgiparang Umshyrpi Bridge-oni uchi 7th Mile, Upper Shillong-ona kingking Madanrting, Mawblei, Laitkor, Nongkseh, Umlyngka aro Lawsohtun, iarangan ong·a.
