Dormaharangko on·ani bidingo seachi ku·rachakjaskal kamrangko ka·kujawa: NGEA

TURA: Garo Hills Autonomous District Council (GHADC)-o kam ka·enggiparangna bilsi gittam ong·na sipile dormaharangko on·kujaengani gimin Meghalaya a·dokni Chief Minister Conrad K Sangma aro GHADC-ni gital Chief Executive Membor (CEM) Benedict R Marak, dormaharangko on·ani bidingo seachi ku·rachakaniko on·kujaskal kamrangko ka·gija jingjengatangkugen ine Sukrobar salo, GHADC-ni Non-Gazetted Employees Association (NGEA) parakataha.
GHADC-o kam ka·enggiparang re·anggipa January jaonin kamrangko dontongate jingjengatengani a·sel kajinarangko gilna man·jaengani gimin aro bang·bata kamrangan bon·chongdikengahani gimin kamtangtangona re·bapilchina aro kamtangtangko ka·taipilchina gita adita salrangna skangsan, GHADC-ni gital CEM, GHADC-o kam ka·enggiparangko didiatahachim ine nikna man·a.
Indake ong·engon, GHADC-ni gital CEM-ko gronge agangrikanio maming ku·rachakanirangko man·jahani gimin NGEA-ni dilgiparang suk ong·gijaniko parakatenba, uamangni dormaharangko on·ani bidingo a·dokni chief minister aro gital CEM, seachi ku·rachakaniko on·kujaskal uamang kamrangko ka·taipilkujawa aro jingjengatanirangko dontongkujawa ine parakatskaaha.
GHADC-o kam ka·enggiparangoni bak 70-de kamtangtangko ka·piltaina kusi ong·enga aro NGEA-ni mitam dilgiparangsan jingjengatanirangko dakangkuna miksongenga ine gital CEM-ni agananikoba NGEA raken jegalataha aro dormaharangko on·kujaskal GHADC-o kam ka·enggiparang pilakan jingjengataniko dontongkujana tik ka·aha ine parakataha.
“GHADC-o kam ka·enggiparangoni 70 percent-de kamtangtangko ka·piltaina kusi ong·enga aro NGEA-ni mitam dilgiparangsan jingjengataniko dontongjana miksongenga ine badiaba badiaba songbadrango seaha indiba chinga NGEA-ni dilgiparangsan ong·aigija GHADC-o kam ka·enggiparang pilakan jingjengataniko dontongkujana manchimanaha,” ine NGEA-ni joint secretary Flaming B Marak parakataha.
GHADC-ni gital CEM-ko seokani ja·mano, NGEA-ni dilgiparang uko grongenba, GHADC-o kam ka·enggipa manderangni dormaharangko on·china agangrikangahachim indiba ua somoio gital CEM, uamangna maming ku·rachakanirangko on·na man·jahachim.