U·IATTIMGIPAONI
TURA: Ki·tap serakgipa William Shakespeare-ni atchiani salko maniani bak gita bilsianti manirongenggipa English Language Day-ko mijal Sukrobar salo, Tura-ni Don Bosco College-oba maniangaha aro ia salko manina gita dingtangmancha program-ko college-ni English Department ong·atangaha.
Ia program-ko ong·atanio Don Bosco College-ni ning·o donggipa English department-ni Dr Barbara S Sangma, chatro chatrirangna aro tom·anio bak ra·giparangna aganprakengon, English ku·sikni gamchatgipa ong·ani bidingo aganangenba, English ku·sikchi sea jotanio William Shakespeare-ni on·gilanirangko jinmana talate on·angaha.
Ia program-ko ong·atanio Tura Don Bosco College-ni principal Rev Fr Bivan Rodriques Mukhim-ba jinmana aganprakengon, ia salko manidilahani gimin college-ni English department-ko mittelpilangaha aro mikkangchi English ku·sikchi sea jotanio gisik nangbatchina gita chatro chatrirangko didiangaha.
Ia program-ko ong·atanio chatro chatrirangba English ku·sikchi segimin ki·taprangoniko golpo aro poedorangko poraiattokaha.
Tom·aniko 2nd Semester-ni chatri Dalanglin Rynjah dilaha aro bon·kamao mittelpilani kattarangko college-ni professor Tengme K Marak aganangskaaha.
Photo: Tura Don Bosco College-o English Language Day-ko manianio bak ra·giparangoni saksa aganprakenga.
