U·IATTIMGIPAONI
SHILLONG: Adita antirangna bijoli siataoni on·tisa rang·sitsokani ja·mano, Meghalaya Sorkari changsatai load schedding ong·attaina gita parakataha.
Bristibaro, Chief Minister-ni chugipa gadangni tom·aniko ong·atenba chanchidilanio tik ka·gimino pangchake load schedding-ko ra·gatatha ine Meghalaya Energy Corporation Limited (MeECL) aganaha.
Ian namen rasong gribeani ong·aha, OTPC Palatana Power Station-ni ge·sa unit-ko tarina gita chipani gimin aro Meghalayao mikka chiko man·anio ja·manchakengani gimin salantian 2-2.5 MU bijoliko chu·onggija man·engani a·sel, a·doko changsatai da·si waljatchioni load shedding-ko ra·gatattaina nangao ga·akaha ine Power Minister James Sangma aganaha.
Board porikkarang dongani gimin chatro chatrirangni namgnina, load shedding-ni somoiko konta gittamona komiatna jotton ka·aha. Indake ong·engon, ia neng·nikanirangko seng·gnange namatna gita Power Department, MeECL baksa kam ka·na jotton ka·enga ineba Pa Sangma agandapaha.
Koborogita, walni 12 bajioni pring 3 bajiona Garo Hills gimik aro Ri-Bhoi district-o bijoliko siatgen, pring 3-6 bajiona Shillong-ko man·chape Khasi Hills gimiko siatgen, pring 6-9 bajiona Lumshnong industries aro Jaintia Public gimiko siatgen, pring 9 bajioni salni 2 bajiona Lumshnong industry areao siatgen, attam 2 bajioni 4 bajiona Lumshnong industries aro Byrnihat industry areao siatgen bon·kame attam 4 bajioni walni 12 bajiona Byrnihat Industry kakketo bijoliko siatanggen.
