Asha worker-rangni man·gniko on·na jotton ka·enga: Hek

SHILLONG: A·doko Asha worker-rangni dingtang dingtang nangnikanirangko chu·sokatna aro uamangni neng·nikanirangko namatna a·dok sorkari sikenga ine Health aro Family Welfare Minister, Alexander Laloo Hek aganaha.
‘‘Skang 2012 bilsionin Asha worker-rangni man·na nanggnirangko chinga on·na man·kuja. Indake uamangni pilak man·na nanggnirangko chinga man·a dipet seng·gnang on·na jotton ka·enga ar uamangni neng·nikanirangko chel·atna gita seng·gnange kamrangko ka·atchina gita anga principal secretary-naba aganatmanjok’’ ine Health Minister aganaha.
Indake ong·engon, ia kamrangni bidingo health department, Finance department baksa bakrime kam ka·gen ineba Hek aganaha.
Asha worker-rangni rights ba bilrangko chel·chakani bidingo a·dok sorkari, niam ra·gatna nanga ine dabigipani bidingoba nirokatgen ineba Health aro Family Welfare Minister AL Hek ka·dongataniko aganaha.
Unomitingo, COVID-19 sabisiko dakgrikchakanio Asha worker-rangba mongsonggipa kamrangkon ka·engani gimin PPE, sanitizer aro glove dakgipa pilak nanggipa bosturangkon uamangnaba sorkari tik ka·e on·enga ine Health minister aganaha.
Asha worker-rangni jeje man·gnirang jedake ABS, MMBS scheme aro gipin man·gnirang, jerangkon skang 2012 bilsionin da·alona kingking man·kujaengachim, uarangko uamangna on·china gita, Meghalaya Asha Workers Union (MAWU) skangon Health aro Family Welfare Minister-na memorandum see on·manahachim.
Indake Indiani gipin gipin a·dokrango gita dake uamangni jaantio man·gnikoba apsandake on·china gitaba MAWU dabiaha. Unagreba Covid-19 duty-koba ka·engani gimin uamangna japrako Tg. 2000-3000 dake tangka paisarangko Asha worker-rangna on·china gitaba MAWU aganaha.