SHILLONG: Meghalaya a·doko load shedding-ko ra·gattaina nangengani a·sel dingtang dingtang porikkarangko seenggipa chatro chatrirang neng·nikanirangko chagrongna nangengani gimin Sombar salo, Federation of Khasi Jaintia & Garo People (FKJGP) central body-ni dilgiparang, Meghalaya a·dokni Power Minister James K Sangma-ko gronge agangrikeaha.
Meghalaya a·doko MBOSE-ni Secondary School Leaving Certificate (SSLC) aro Higher Secondary School Leaving Certificate (HSSLC) porikkako ong·atengon, re·anggipa Sukrobar waljatchionin a·doko load shedding-ko a·bachengataiahani a·sel a·doko songdongenggipa manderang aro mongsongbate porikkarangko seenggipa chatro chatrirang neng·nikanirangko chagrongna nangtaiengahachim.
Indake ong·engon, Load Shedding-ko ra·gatanichi porikkarangko seenggipa chatro chatrirangna maming nangchakeanirang dongjana gita a·dok sorkari, nanga gita ja·kurangko de·anggen ine a·dokni Power Minister James Sangma, FKJGP-ni dilgiparangna ku·rachakaniko on·ataha.
Load shedding-ko ra·gatanichi a·doko songdongenggipa manderang aro mongsongbate porikkarangko seenggipa chatro chatrirang neng·nikanirangko man·jana gita ta·raken Power Minister cholko sandina ku·rachakataha ine FKJGP-ni dilgiparang, kobor ra·timgiparangna parakataha.
Bijoliko kimitna nangengani a·sel porikka seenggiparangna maming nangchakeanirang dongjana gita gipin cholrangko sandichina gitaba FKJGP, a·dokni Power Minister-ko didiangaha.