TURA: Meghalaya a·dokni gipin biaprango gitan Garo Hills-oba COVID-19 ta·raken giprorona a·bachengengaha aro uandaken Sombar walo, South Garo Hills a·jao donggipa Siju joloni bilsi 26 ong·gipa mande saksa COVID man·e siangaha.
South Garo Hills a·jao skanggipa chang bi·sa bakgitchakrangba COVID-19-ko man·na a·bachengaha aro kobor on·timgiparangni u·iatani gitade, jasku ong·kuenggipa me·chik bi·sa bakgitchakko COVID-19-na porikka ra·anio positive ong·aha.
A·songni gipin biaprango COVID giproroengahani gimin lockdown-ko ra·gatengahaon, dingtang dingtang biaprango donge poraienggipa aro kamrangko ka·enggipa manderang da·o songtang noktangona re·bapiltokengahani a·sel Garo Hills-oba ta·raken COVID-19 giprorona a·bachengataiaha ine official-rang parakataha.
Koborko on·ani gitade, South Garo Hills a·jao donggipa Karukol-Siju joloni bilsi 26 ong·gipa chadambe saksako sanna gita Tura Civil Hospital-ona ra·baahachim indiba ua Sombar walo siangaha.
Ia chadambeko uni rang·sitanio neng·nikanirangko man·engani gimin Baghmara civil hospital-o admit ka·chengahachim indiba ja·mano uko nambate sanna gita Tura Civil Hospital-ona ra·baskaahachim. Tura-ona sokbaani ja·man uko COVID-19-na porikka ra·e nion ua positive ong·aha aro ua Sombar walon janggi galaha.
Mongolbar salo, jasku ong·kuenggipa bi·sa bakgitchak baksana uni ma·gipa pagipakoba Baghmara civil hospital-o COVID-na porikka ra·e niengmiting somoio positive ong·aha ine kobor on·aha.
Indake ong·engon, Tura-oba Tura civil hospital-o gipin biaponi re·bapilgipa mande saksako sanengmiting somoio doctor saksa COVID-19-ko man·aha aro apsan salon, State Bank of India (SBI) Regional Branch office-ni bank official sakgittamba positive ong·aha ine kobor on·aha. Iana skang, bank-o kam ka·enggipa mande saksa positive ong·ahani gimin gipin kam ka·giparangkoba porikka ra·e nion ia bank-ni official sakgittam positive ong·aha.
“COVID-19-ni giproroaniko champengna dongimin niamrango pangchake chingaba bank-o kam ka·giparangko 50 percent-ona komiataha,” ine sakgittam official-rang COVID man·ani ja·man Regional Branch Manager DB Koch parakataha.
West Garo Hills a·jani Deputy Commissioner Ram Singh-ni parakatani gitade, gipin biaprangoni re·bapilenggipa bang·bata manderangan positive ong·enga aro gipin biaprangoni re·bapilenggipa manderang, noktangtangon dingtang nape dongtokna nangengachim.
Mongolbar salo, South West Garo Hills a·jaoba mande sakgni aro East Garo Hills a·jaoba mande sakbonga COVID-na porikka ra·e nianio positive ong·aha ine kobor on·aha.