TURA: Meghalaya a·doko ta·rakbee COVID-19 giproroengahani gimin Meghalaya a·dok gimikon gilja nokrango olakkianirangko minute 45-na bate ka·jachina sorkari u·iataha.
Meghalaya a·dokni Chief Secretary MS Rao-ni u·iatani gitade, Shillong songjinmani wilwilao donggipa gilja nokrango bak 100-oni bak 25-na bate manderang tom·na man·jawaha indiba a·dokni gipin biaprangode da·o dipet bak 50-na bate tom·na man·skajawa.
“Badiaba badiaba olakkiram nokrango COVID-19-ni giproroaniko champengna dongimin niamrangko ja·rikjaenga ine nikna man·a. Uni gimin olakkiram nokrango niamrangko ja·rikchina gita toromni dilgiparangan nirok sandianirangko dakchina,” ine a·dokni Chief Secretary parakataha.
Jolo ong·enggipa obostani kri olakkiani somoirangko tik ka·e on·china gita ua, dingtang dingtang a·jani deputy commissioner-rangnaba ge·etaniko on·ataha.
“Badiaba olakkiram nokrango niamrangko ja·rikjaenga ine nikgenchimode ua olakkiram nokko chipe donna gita deputy commissioner-rangna bilko on·enga,” ine Chief Secretary parakataha.