SHILLONG: Shillong District jail-o donggipa pilak koedirangkon COVID tikarangko suM’layao koedirangko COVID tika su·tokna chanchiatokna gita Meghalaya Sorkari chanchiaha.
Pattoko dongenggipa koedirangko COVID tika su·na gita Health Minister AL Hek aro IG (Prisons) M Kharkrang mangi Mongolbaro Shillongo tom·anio chanchie tik ka·aha.
Health Minister, AL Hek indakeba aganaha je a·dokni pattok ge·antio donggipa koedirangkon COVID tikarangko su·na gita chanchie tik ka·aha aro koedirangko tika su·aniko Shillong district jail-oni a·bachenggen.
“Pattokrangara namen kenchakani gnanggipa biaprang ong·a, chinga pilakkon tika su·na gita re·chakatgen ong·jaode iandakgipa biaprangoni COVID sabisi jelwakna chinga kenchakenga” ine Hek aganaha aroba da·o dipetode Shillong district jail-o positive man·gipa darangba dongkujaenga, ua agandapaha.
Shillong district jail-o koedirangni changket sket dakanirangko olgrokatani bidingo sing·anina aganchakengon, Shillong district jail-o koedirangni changket sket dakaniko olgrokatnan, Shillong songjinmao ge·sa central jail-ko rikna gita Sorkari kamrangko ka·enga ine Health Minister aganaha.
Songjinmao COVID sabisi ta·raken giproroengani gimin da·o dipetode jail authority-rang, darang koedikoba uamangni bakdilrangko grongna gita on·jaenga, phone-rang gitasan agangrikna on·enga.
Mija February 2021-onade, Shillong District jail-o sak 417 koedirang donga . unomitingo Jowaio sak 172 koedirang donga.
Apsandake Tura district jail-oba mija February jaondae sak 231 koedirang donga, Unomitingo Williamnagar jail-o February 28 tarikonade sak 28-sanengachim. Indake Nongpoh District jail-oba sak 159 koedirang donga.
Indake ong·engon, COVID sabisina kenchakani a·selan, da·sikariode pattoko mande jelwakaniko olgrokatna ine adita koedirangko Shillong District jail-oniko watahachim, indiba ia bilsiode da·o dipet koedi saksakoba pattokoniko wata dongkuja.
