SHILLONG: A·doko damgittam oxygen plant-rangko songdimani kamko jedakeba May 20 mangode matchotatna gita nisan ka·enga ine Health Minister AL Hek Mongolbaro aganaha.
Gnigipa changna giprorotaienggipa COVID-19 sabisiko dakgrikchakna gita Meghalayao damgittam oxygen plant-rangko donna gita Ma·mong sorkari ra·chakaha.
Ia damgittam oxygen plant-rangko East Khasi Hills, West Garo Hills aro West Jaintia Hills district-rango damprak dake donanggen.
A·dokona oxygen-ko ra·baani bidingo aganengon, Health Minister indake aganaha je, “da·o dipetode chu·onga gitan oxygen-ko man·enga…chinga gipin damgittam oxygen plant-rangko PM care fund-oniko man·dapsoenga indake ia damgittam oxygen plant-rangko a·doko songdimna re·chakatenga.”
“Oxygen palgiparang, jemangan a·dokona oxygen-ko sokate on·nasienga uamangan pilak nanganirangko ra·baenba May 20-ni gisepon oxygen plant-rangko songdimaniko matchotatgnok,” Health Minister agandapaha.
Ia damgittam oxygen plant-rangko songdimani pilak kamrangkon Health aro Family Welfare Ministry-ni gitan ka·anggen.
A·songo uandake a·dokrango Covid-19 sagiparangna aro gipin sagiparangna nanggitikao chu·onga gita oxygen-rangko on·na man·na gita aro sorkari hospitalrango oxygen-rangko bon·changatjana gita Sorkari ia Oxygen Generation Plant-rangko donnatna tik ka·aha. Unomitingo Meghalaya Chief Minister Conrad K Sangma, mija Sombar salo Ri-Bhoi district-ni oxygen plant-ko re·ange nieaha.
‘‘Oxygen plant-o kam ka·enganirangko nirokna aroba oxygen-na neng·nikanirangko chagrongaona maikae tarisoenga uko sandina gita re·angaha’’ ine Pa Sangma aganaha. Byrnihat-o donggipa oxygen plant unit, salprako 2000 cubic meter oxygen-ko tarienga.
