TURA: India a·songni gipin a·dokrango COVID-19 giproroengani a·sel lockdown-ko ra·gattaiengahani gimin gipin biaprango donge poraienggipa aro kamrangko ka·enggipa manderang songtang noktangona re·bapiltokengahaon, gipin biaprangoni re·bapilenggipa manderangko COVID-19-na porikka ra·anio positive ong·tokengani gimin Garo Hills-o COVID-19-ni giproroaniko champengna gita Tura jillao donggipa pilak skulrangkon Budbar saloni re·baenggipa May jani 8 tarikona chipe donchina gita West Garo Hills a·jani Deputy Commissioner Ram Singh u·iataha.
Deputy Commissioner-ni u·iatani gitade, Chibragre-o donggipa St John Secondary School aro Alotgre-o donggipa Auxillium Secondary School-rangko man·chape Tura jillao donggipa pilak skulrangkon May jani 8 tarikona chipe donanggen aro skulrangko chipe donani somoio class-rangko online gita ra·skana man·gen.
Skulrangko chipe dongenchimoba MBOSE-ni SSLC aro HSSLC porikkarangko ong·atengani gimin ia porikkarangkode donsogimin somoi gitan ong·atangkuaigen indiba porikkarangko ong·atanio COVID-ni niamrangko rakbate ja·rikangskana nanggen ine Deputy Commissioner u·iataha.
Tura jillani ning·o donggipa pilak dokkanrangkoba Budbar salonide attam 7:00 baji dipet chiptokna nanggnok aro Robibar salode salgimikan dokkanrangko chipe dontokna nanggen ine Deputy Commissioner u·iataha. Sam dokkanrang aro nokona sokate on·gipa dolrang Robibar salrangoba an·tangtangni kamrangko ka·na man·skaaigen.
Da·o dipet wal 11:00 bajioni pring 5:00 bajiona ong·atenggipa walni curfew-koba wal 10:00 bajioni pring 5:00 bajiona ong·atangskagnok ine West Garo Hills a·jani Deputy Commissioner u·iataha.
Kam nangchongmotana nokoni ong·katengon, mask-rangko ganjringchina aro rongtal an·talaniko rakkichina gitaba DC u·iataha.
Mande jinmani biaprango aro kam ka·chakram biaprango skatang stujachina aro ta·makkurangko jakkaljachina gitaba DC mikrakataniko on·angaha.
Sorkarini dongimin niamrangko pe·genchimode Epidemic Disease Act 1897-ni Section 2-ni ning·o on·gimin bilrango pangchake dongimin officer-rang, ja·kurangko de·anggen ineba DC mikrakataha.
Curfew-ni somoio police-rang, fire & emergency service, medical, MeECL, PHE, PWD, Press aro uandake nangchongmotgipa kamrangko ka·enggipa dolrangkode champengani dongjawa ine DC u·iataha.
