SHILLONG: Meghalaya a·doko ta·rakbee COVID-19-ni giproroenganiko champengna gita Meghalaya sorkari, re·baenggipa May 1 tarik pring 5:00 bajioni May-ni 10 tarik pring 5:00 bajiona rakbatgipa niamrangko ra·gatna Budbar salo tik ka·e donangaha.
Budbar salo, a·dokni Chief Minister Conrad K Sangma-ni dilanichi dingtangmancha tom·aniko ong·atangenba, ia biap damgittamo rakbatgipa niamrangko ra·gatna manchiangaha.
Tom·a matchotani ja·mano a·dokni Deputy Chief Minister Prestone Tynsong-ni parakatani gitade, ia sal 10-ni gisepo toromni gita ba gipin jinma tom·bimonganirangko ong·atna man·jawa indiba bia ka·ani aro mande sianirangode deputy commissioner-rangni dongimin niamrango pangchake tom·anirangko ong·atna man·gen.
May 1 tarikoni May 10 tarikona kal·susaanirangkoba ong·atna man·jawa aro private office-rangkoba chipe donna nanggen indiba nangchongmotgipa kamrangko ka·enggiparangde dongimin niamrango pangchake kamko ka·na man·gen ine Deputy CM parakataha.
Office-chi re·na nangchongmota ong·gijagipa sorkari office-rango kam ka·giparangba noktangtangoni kamko ka·skana man·gen.
Deputy Chief Minister-ni u·iatani gitade, ia salrangni gisepo skul, college, university aro uandakgipa dingtang dingtang institute-rangkoba chipe donangkugen.
Manderangko salruragipa garirangna dongimin niamrangni gimin janapatengon, bus, sumo, auto, maxicab aro uandakgipa garirango bakbrioni baksana bate manderangko gatna man·jawa indiba sanna bananina, nanggitikanina, tika su·anina, porikka seenggipa chatro chatrirangna, skigiparangna aro porikkao kam ka·enggipa manderangnade maming champengani dongjawa ine Deputy Chief Minister parakataha.
Maiba nangchongmota kamrangna songre songgabatna nangenggipa manderangde deputy commissioner-rangoniko permission ra·chengna nanggen aro uamangna deputy commissioner-rang pass-rangko on·gen ine Tynsong parakataha.
Manderangni nangchongmotgipa bosturangko palenggipa dokkanrangkode ia salrangni gisepo kulina on·gen aro iandakgipa dokkanrangna deputy commissioner-rang niamrangko tarie on·anggen ine Deputy Chief Minister parakataha.
Sorkarini dongimin niamrangko saoba pe·genchimode uni kosako rakgipa ja·kurangko de·anggen ineba Deputy CM, mikrakataniko on·angaha.
