AMPATI: Budepa butchumarangna Maintenance & Welfare of Parents & Senior Citizens Act 2007-ni ning·o on·enggipa dakchakanirangko agan-talate on·na gita Bristibar salo dingtangmancha awareness program-ko South West Garo Hills a·jani District Social Welfare Office-ni gita Ampati Girls Secondary School-o ong·atangaha.
Ia program-ko ong·atanio, budepa butchumarangna namgni ong·gipa cha·ani ringani, MHIS aro National Programme for the Health Care of Elderly (NPHCE)-ni bidingo Ampati Civil Hospital-ni Medical & Health Officer Dr Mikrak D Sangma agan-talate on·angaha aro Schemes for Senior Citizens (IGNOAPS)-ni bidingo Betasing Block-ni Gram Sevika Bharoti Sangma agan-talate on·angskaaha.
Ia program-ko ong·atanio South West Garo Hills a·jani dingtang dingtang biaprangoni sak 30-mangni gita budepa butchumarang, jemangan COVID-ni gnigipa tikako su·na senge dongengachim, uamang bakko ra·angaha aro COVID-19 baksana an·tangtangni ma·sie ra·na sikenggipa dingtang dingtang kamrangni bidingo official-rang baksa agangrikangaha.
