Delhi-o jingjengatenggipa chadamberangko police-rangni jak sokanina CBCI jegala
SHILLONG: Re·anggipa Sombar salo, New Delhi-o Cockroach Janta Party (CJP)-ni dilanichi, jingjengatgipa chadamberangko ‘goe galchina’ social media-o seatahani gimin Bharatiya Janata Party (BJP) youth wing-ni president Mewakar Lyngdoh Pakma-ko jegalgrimtokengon, da·o dipet a·doko BJP-ko dilenggiparang, iani bidingo maming ku·rangko on·skakujaenga.
Jingjengatgipa chadamberangko ‘goe galchina’ social media-o seahani gimin BJP-ni chadambe dolko dilgipa Mewakar Lyngdoh Pakma-ko dingtang dingtang dolrang aro manderangba social media-rango matnangtokengon, da·o dipet iani bidingo a·dokni BJP-ko dilgiparang, maming aganchakaniko on·skakujaenga.
Iani bidingo kobor ra·timgiparang manderang, whatsapp group gita BJP-na ku·wattimgipa M Kharkrang, BJP MLA AL Hek aro gipin dilgiparangoba sing·doatahachim indiba da·o dipet ia dilgiparang, iani bidingo maming aganchakani ba talataniko on·gija, chadamberangni neng·nikanirangko namatna gita Prime Minister Narendra Modi-ni dilanichi ma·mong sorkari ja·kurangko de·aha inesa aganchakaniko on·tokaiaha.
BJP MLA AL Hek-ba Mewakar Lyngdoh Pakma-ni social media-o seatgipa kattarangni bidingo mamingkoba janapjaha indiba BJP aro sorkari, chatro chatrirangni nanganirangna simsakenga inesa parakataiaha.
“An·chingni chatro chatrirang, neng·nikanirangko chagrongna nangtokenga aro uamangni neng·nikanirangko namataniara chingni daitoan ong·a,” ine Hek parakataha.
Union Education Minister Dharmendra Pradhan-ko kam watchina dabienggipani bidingo sing·on, iani bidingo sorkari ning·tue nichenggen aro ja·manosa nangani kri ja·kurangko de·gen ine Hek parakataha.
Dharmendra Pradhan-ko BJP-chi dilenggipa ma·mong sorkari, ra·galna miksonganirang dongama ine sing·anina aganchakaniko on·angengon, ia pilakan ma·mong sorkarini skaniosa ong·aigen ine Hek aganaha.
Indake ong·engon, porikkarango paper leak ong·aniko jegale, Delhi songjinmao ‘Sansad March’ ba jinma re·jomanio bak ra·giparangko Delhi Police-ni teargas-rangko godape aro gol·dikrangchi dokruruahani gimin Catholic Mondolini Catholic Bishops Conference of India (CBCI)-ba raken jegalataha.
Tom·tome jingjengatenggipa chadamberangko teargas godape aro gol·dikrangchi police dolrangni dokruruaniara, a·songo mandena on·gimin jakgitelaniko pe·ani gita ong·aha ineba CBCI parakataha.
CBCI-ni parakatani gitade, lekka porani kamrango olgrokanirangko nikengani giminsa chatro chatrirang aro chadamberang, kamrangko namdapatchina dabie jingjengatengachim aro chadamberangni iandake tom·tome jingjengataniko bil jakchi champengna jotton ka·aniara a·songni niam bidiko mandena aro a·songna on·gimin bilko pe·ani gita ong·a.
Lekka porani kamrango dingtanganiko ra·bachina dabie okumu chakenggipa Sonam Wangchuk-naba CBCI chakpaaniko parakataha.
