Baghmara-ni Indo-Bangla simao check gate-ko kulichina Siju-Rongara MLA didia

TURA: Baghmara-ni Indo-Bangla simao integrated check gate-ko songgenchimode uan a·song damgninan namgni ong·e, South Garo Hills a·jao namroro silroroaniko ra·bana dakchakani ong·genchim ine ia simao check gate-ko kulichina gita Siju-Rongara-ni MLA Rakkam A Sangma, a·dok sorkariko didiangaha.
Iani bidingo ua Bristibar salo a·dokni Chief Minister Conrad K Sangma-ko gronge memorandum-ko on·angaha aro iani bidingo Home Affairs Ministry-ni Land Ports Authority of India baksa agangrikchina gitaba didiangaha.
Chief Minister-na sedoatgipa chittio Sangma-ni parakatani gitade, Baghmara aro Bangladesh a·songni simao check gate-ko kuligenchimode a·song damgnini ma·manti bosturangko bading chiwalgrike, bading chiwalgrikaniosan ong·aigija pilak kamrangon namroro silroroaniko ra·bana cholrang ong·genokchim.
“Chingni nanganikani gita ia biapo check gate-ko kuligenchimode a·songni dingtang dingtang biaprangonikosan ong·aigija a·gilsak gimikonikon tourist-rangko salbana man·gnokchim maina Meghalaya a·doko manderangni rotogipa aro nina nitogipa biaprang bang·en donga. South Garo Hills a·jamangmangon Balpakram, Siju Cave, chiring darerang, buring bolgrimrang aro aiao inmanbegipa biaprang bang·en donga. Ia biapo check gate-ko kuligenchimode ian gipin a·dokrangona cholguga gitaba ong·genchim,” ine Siju-Rongara MLA parakataha.
Baghmara-oni Dhaka-ona kilometre 182-san chel·aia ine janapatengon, ia biapo check gate-ko kulichina dabiani chu·sokgenchimode pilakni gitan a·song damgninan aro mongsongbate South Garo Hills a·jana namgni ong·gnokchim ineba Sangma parakataha.