U·IATTIMGIPAONI
TURA: Assam a·doko songdongenggipa A·chikrangna COVID-19-ni bidingo talate on·aniko aro mikrakataniko on·na gita Sukrobar salo, Assam a·dokni Kamrup aro Goalpara a·jao donggipa dingtang dingtang A·chik dolrang, A·chik songni dilgiparang baksa nangrime awareness program-ko Santipur songo donggipa Garo National Council (GNC)-ni office-o ong·atangaha.
Ia sal somoirango ta·raken COVID-19 giproroengani gimin an·tangtangko simsake dongchina didiangan baksana ia program-ko ong·atanio dingtang dingtang A·chik dolrang, tom·anio bak ra·giparangna mask-rangkoba suale on·angjolaha.
Assam a·doko songdongenggipa A·chikrangna dingtang Garo Autonomous Council (GAC)-ko bilakbate dabiangkuna gita ia tom·anio dingtangmancha United Garo Autonomous Council Movement Committee (UGACMC)-koba gital dake songpiltaiaha ine u·iataha.
Koborko on·ani gitade, gitcham UGACMC-ko ia 2021 bilsini March 11 tariko bon·ate iani bidingo Goalpara-ni Deputy Commissioner-na March 12 tariko u·iatahachim.
Indake ong·engon, ia gital UGACMC-ni gital dilgiparangara, chairman-na Kamrup-ni Suneet P Marak, vice chairman-na Goalpara-oni Sengsak Sangma, general secretary-na Goalpara-oni Benhur Sangma, joint secretary-na Kamrup-oni Enindra R Marak, treasurer-na Kamrup-oni Duland Sangma aro publicity secretary-na Goalpara-oni Brayan Marak ong·a ine u·iataha.