U·IATTIMGIPAONI
SHILLONG: A·doko by-election ong·atna bangki dongenggipa seat-rango susana gita miksongani dongja ine HSPDP parakaha.
A·doko, by-poll ong·atna bangki donggipa ge·gni constituency-rangon susaanio bak ra·na gita uni party miksongani dongja ine HSPDP MLA Renikton Lyngdoh Tongkhar aganaha.
Mawryngkneng aro Rajabala ia damgni constituency-rango MLA ong·enggiparangni siangtokani gimin ia ge·gni assembly seat-rangna by-election-ko ong·atna ga·enga.
Indake ong·genchimoba saoba namgipa candidate-rang re·bae susana gita party-o agangenchimode, party indakgipa candidate-rangko champengsoanide dongjawa ineba Tongkhar aganaha.
‘‘Garo Hills-ode ga·chakna gita chingna maming dongkuja, indiba Khasi Hills-ode Mawryngkneng-o, HSPDP candidate ong·e Pyniad Syiem skanggipa changna MDC election-o cheaha, unigimin chinga ma·sina man·a je manderang chingni party-ko namnikgiparang donga,’’ ua agandapaha.
