U·IATTIMGIPAONI
TURA: Ia chango COVID-19 bilakbate aro ta·rakbate giproroengani gimin an·tangtangko naljoke rakkina man·na gita mask-rangko ganna nangani bidingo a·dokni Health & Family Welfare department, dingtangmancha niamrangko donataha.
Sorkarini dongimin niam gitade, bilsi 2 ba una batgipa manderang, noktangtangoni ong·katengon, N-95 mask ba gadang gittam dake kogimin mask-rangko ganna nanga indiba mask-rang, altuae rang·sitna man·na gita plastic ba bigilniko tarigipa mask-rang ong·na nangjawa.
Mask-rangko ganna skang ba mask-rangko okani ja·man jakrangko rongtalatchina gitaba sorkari u·iataha.
Noktangtango COVID-19 man·gipa manderangko sanenggipa manderangkoba aro sannako man·enggipa mandekoba mask ganjringchina gita sorkari u·iataha.
Bilsi 60 batgipa manderang, jemangan COVID-19-ni result-rangna sengengachim, uamangkoba manderang baksa ong·engmiting somoio mask-rangko ganjringchina gita Health department u·iataha.
Noktangtangoni ong·katengon, mask-rangko ganan baksana pangnan saksa sakgipinoni chel·tanggrike dongchina gitaba Health department u·iataha.
