U·IATTIMGIPAONI
SHILLONG: Skanggipa changona bate ia chango manderang COVID-19-ni niamrangko ja·rikanio komibatenga ine Meghalaya Assembly-ni Speaker Metbah Lyngdoh, suk ong·gijaniko parakataha.
Assembly Speaker-ni parakatani gitade, ia chango COVID-19 bilakbate aro ta·rakbate giproroengoba manderangni simsakanirang namen komibatenga aro iani a·selba Meghalaya a·doko COVID-19-ko man·giparang da·o batrorobaengaha.
“Re·anggipa bilsiode manderang sorkarini dongimin niamrangko ja·rike bakrimaniko on·ahachim. Meghalaya a·dokosan ong·aija, India a·song gimikon skang changode manderang niamrangko manibattokahachim. Indiba angni nikani gitade, ia chango manderang sorkarini dongimin niamrangko manina gisik nangbretokjaenga aro sabisini giproroaniko champenganio sorkari baksa bakrimaniko on·jaenga,” ine Lyngdoh parakataha.
Lyngdoh-ni aganani gitade, re·anggipa bilsiona bate ia chango COVID-19 man·e sigiparang bang·batengaha aro iana a·doko songdongenggipa manderangan pilakan simsakbena nangengaha.
Sabisiko warachakani nambatgipa cholara COVID-ni tikako su·e ra·anian ong·enga ineba ua chol man·enggipa manderang pilakkon tika su·e ra·china gita didiataha.
Bilsi 18 batgimin manderangnaba sorkari, May 1 tarik dipet tikarangko su·na manchisoahachim indiba samrang sokbakujaengani a·sel tikarangko su·na man·tokkujaengachim.
Indake ong·engon, ja·delgimin manderangkosan ong·aigija chadamberangkoba COVID-19-na simsake dongchina gita Assembly-ni Speaker ku·pattianiko on·ataha.
“Bilsi 20 ong·gipa manderangoniba ia sabisiko man·e oxygen ra·e dongna nangenggiparang dongaha. Uni gimin darangba ia sabisiko mikchepjachina,” ine Lyngdoh parakataha.
Meghalaya a·doko COVID-19 ta·raken giproroengahani gimin a·dokni pilak dolrangan re·baenggipa antio apsan tom·e chanchirimanggen ineba Lyngdoh parakataha.