MeECL-o cha·bokgipani kosako jakgitele sandirokatchina UDP dabia

SHILLONG: United Democratic Party (UDP), jean MDA sorkario bakrimpaenggipa political party-rangoni mongsonggipa ong·engachim, uamang Meghalaya Energy Corporation Limited (MeECL)-o kamrang tik ong·ja aro bang·a tangka-paisarangko jakkalsretaha ine matnangengani bidingo jakgitele sandirokatchina gita agency-rangni jako pakwatchina dabiangaha.
MeECL department-o kamrang tik ong·jaenga aro bang·a tangka-paisarangko jakkalsreta ine matnangengani bidingo jakgitele sandirokatchina ine UDP-ni president, Metbah Lyngdoh mni Bristibar salo a·dokni Chief Minister, Conrad K Sangma-na seachi dabiangaha ineba koboro janapataha.
Metbah, jean da·o UDP-ni president aro Meghalaya Assembly-ni Speaker-ba ong·engachim, uni kobor ra·timgiparangna parakatani gitade, uni chief minister-na sedoatgipao uni party MeECL department-ni kosako jakgitele sandirokaniko dakchina gita ming 10 point-rangko janapangjolaha.
MeECL-o ru·uta bilsirangna skangonin sorkarini chief secretary-rangsa aro gipin a·gipi IAS officer-rangsa CMD-ni biapko ra·rongengani bidingo sing·on, Lyngdoh, MeECL-ko, u·i-ma·sigipa aro chugipa gadangni a·gipi official-rangsa jako ra·na nanga ine aganchakaha.
“Angni chanchia aro bebe ra·ani gitade, MeECL-ni skotongde jakgitelgipa officer, jean dingchike aro rake kamko ka·gipasa ong·na nanga, jedakode corporation-ko nambatatna man·gen,” ine UDP president parakaha.
Lyngdoh iani bidingo parakatengon, “MeECL-o skangoni da·alona kingkingba tik ong·e kamko ka·gijanirang aro tangka-paisa jakkalsretani, cha·boke cha·anirang dongkuengani gimin, darangkoba jaksi otna nangjana aro darangkoba matnangjana gita jakgitele sansirokaniko dakna nanga aro dos dakgipa manderangko ra·galna nangchongmota,” ineba dabianniko dakangjolaha.