SWGH DC, kam ka·giparangko lockdown-ni somoio kamona sokbachina didia

AMAPATI: Meghalaya a·doko covid-19 sabisi jelbatrikrikengaoniko champengna sorkarini ra·gatgimin niamo pangchake, Tura songjinmao nangbregijagipa mal-bosturangko palenggipa dokanrangko chipatan baksana nangchongmotgipa kamna agre a·jao gipin biap ba a·jachina re·ruraenggipa manderangko aro gari-gurarangko dchampengatengon, ia cholko ra·e Tura-oni South West Garo Hills a·jani dingtang dingtang sorkarini office-rango kamko ka·enggiparangko jedakeba kamtangtangona sokbachina a·jani Deputy Commissioner didiataha.
South West Garo Hills Deputy Commissioner, Ch. Ramakrishna-ni sorkari office-rango kamko ka·enggipa manderangna mikrakatani gitade, Tura songjinmao donge South West Garo Hills district-o ga·akgipa sorkarini dingtang dingtang office-rango kamko ka·enggiparang, ia sal somoirango covid sabisini jelbatrikrikako komiatna miksonganio a·dok sorkari a·jao skatang re·rura-doruraenggipa gari-gurarangko champengatani gimin ia a·selko pa·sike kamtangtangona sokbagija dakna man·jawa, aro uamang jedakeba an·tangtangni kamona sokbatelna nanggen.
“Tura songjinmaoni re·rurae a·jao kam ka·enggiparang, covid sabisi jelbatrikrikengani gimin gimikni gitan champengatani sal somoirango, an·tangtang re·rurae kamko ka·na man·a gita an·tangtangna DC-ni hukumrangko tarichina, ong·jaoba uamang jeo kam ka·engachim, ua biap ba a·jaon dongkame kamona re·baskachina,” ineba South West Garo Hills-ni Deputy Commissioner, Ch. Ramakrishna kam ka·giparangko didiataha.
Indakgipa a·sel ba obostarangko nikna man·engon sorkarini office-rango kam ka·enggiparang, dingtang dingtang obostarangchi pa·sike kamtangona sokbagija dakna man·jawa ineba ua kam ka·giparangko mikrakatjolaha.
Koborna parakatani gitade South West Garo Hills district-ni dingtang dingtang department-o aro sorkarini mongsonggipa office-rango kam ka·enggiparang bang·batan Tura-oni ong·a aro uamang salantian Ampati-o donggipa kamtangtangchi noktangtangoni re·rurarongachim.
Uandakgipa sorkarini ning·o kamko ka·enggpipa manderangna kamtangona re·rura-dorurachina ine District Administration-ni gita ‘car pass’-rangko on·skaenga ineba koborna parakataha.