COVID-ni tikako su·e ra·china sorkari manderangko didiata

SHILLONG: Meghalaya a·doko COVID-19-ko man·giparang batroroengahani gimin tikarangko su·e ra·na chol man·enggiparangkode COVID-ni tikako su·e ra·china gita re·anggipa Sonibar salo, Health Services (MI)-ni Director Dr Aman War didiataha.
Sonibar salo, medical-ni dingtang dingtang official-rang baksa agangrikengmiting somoio Dr War, COVID tikani gamchatgipa ong·ani bidingo talataniko on·angenba, a·doko tika su·na chol man·enggipa manderangko su·e ra·china didiataha.
Meghalaya a·doko rang·san COVID-19-ko man·giparang tang·doangahani gimin an·tangni cholgri ong·aniko janapatengon, “Sabisi giproroaniode politics dongja indiba ku·cholsan nangrimanian bil ong·a,” ine Dr War parakataha.
Meghalaya a·doko aro mongsongbate Shillong, Tura aro Jowai-o sal 10-na manderangni re·ruraanirangko, kam ka·anirangko aro bazar anti cha·anirangko champengatanichi bewalde sabisini giproroaniko champengna man·gen ineba ua an·tangni ka·dongchakenganiko parakataha.
“Chinga ru·uta somoirangonin iana tarisamsoengahachim indiba da·alo an·chingni gisepo mai ong·enga an·ching nikna man·engaha. Chingni tarisamsoanirang chu·ongjaha gita nika indiba a·dok sorkari baksa chanchirimani ja·mano, sabisini giproroaniko champengna chinga sal 10-na manderangni jinma tom·dakanirangko champengataha,” ine Dr War aganaha.
COVID-ni tikarangara ia sal somoirango namen nangchongmotgipa ong·enga ine janapatengon, manderang an·tangtangko naljoke rakkina man·genchimode hospital-rango inditana neng·nikanirangko chagrongna nangjawa ine Health Services-ni Director parakataha.
“Hospital-rango kam ka·giparangko neng·gokatna aro hospital-rango man·enggipa cholrangko chinga bon·changatna sikjaenga,” ine ua aganaha.
Indake ong·engon, COVID-19-ko sanna gita maming gipin cholrang dongja aro tikako su·e ra·anisan an·tangtangko ia sabisioniko naljoke rakkiani chol ong·enga ine Indian Institute of Public Health-ni Dr Rajiv Sarkar-ba parakataha.