SHILLONG: Meghalaya a·doko forest guard-rang nambate nirok sandina man·na gita a·dok sorkari, forest guard-rangnaba silchidarerangko on·piltaina tik ka·angaha.
Meghalaya a·doko matburingrangko so·ote galanirang batroroengani gimin buringrango nirok sandianirangko dakenggipa forest guard-rangna, silchidarerangko on·piltaignok ine Sombar salo, Meghalaya a·dokni Forest & Environment Minister James PK Sangma parakataha.
Re·anggipa April-ni 19 tariko Forest department-ni official-rang koborko man·soenba, Meghalaya Police aro Wildlife Crime Control Bureau (WCCB)-ni sipairang baksa, Ri Bhoi a·jani Khliehumstem songo donggipa Assam Rifles sipai saksani nokko chadrapeahachim aro ia nokoniko sipairang, kawatte aro gokerangko man·ahachim. Ia nokoniko police-rang, mobile phone-rang aro tangka gong 25,500 baksana noko dongipa AS 025 -0127, ML-10 A -9330 aro ML 10 C 4056 gari bolgittamkoba rim·ahachim.
Ia Assam Rifles-ni sipai baksana police-rang, ia nokoniko Pynshngianlang Sten, Fieldstar Lyngdoh, Banker Ronghang, Darwin Phangcho, Edison Teron, Klinson Bey aro Siparlin Rani minggipa mande saksnikoba rim·aha ine kobor on·aha.
Indake ong·engon, buringrango donggipa matburingrangko aro gimaangenggipa ma·manti jonturangko rim·e palsrukna man·jana gita Forest department, rakbata ja·kurangko de·na manchiaha ine Forest Minister parakataha.
Sangma-ni u·iatani gitade, batanggimin somoirango bobil dake chakatgipa manderang, buringrangona re·bae, forest guard-rangna on·gipa silchidarerangko ra·e katrongani gimin forest guard-rangna silchidarerangko on·jahachim indiba da·o forest guard-rang buringrango nirok sandianirangko dakna gita silchidarerangko ra·bitna nangchongmotenga ine nikenba sorkari, forest guard-rangna silchidarerangko on·piltaina tik ka·aha.
Da·o Meghalaya a·doko obostarang namkalahani gimin forest guard-rang kamrangko nambate ka·na man·na gita silchidarerangko on·piltaina tik ka·aha ineba Forest Minister parakataha.
M’laya-o forest guard-rang silchidarerangko jakkalpiltaina man·gnok
Date:
Share post: