TURA: Garo Hills-ni dingtang dingtang biaprango mande rim·gittangani, ra·seke ra·ani, mande so·otani aro uandake ma·manti namgija kamrangko ka·anio jak donggipa William A Sangma-ko re·anggipa Robibar attamo, ma·sina man·gijagipa manderang so·ote galangaha ine kobor on·aha.
So·ote galako man·gipa William Sangma, batanggimin somoirango pattoko donako man·aoniba changgni joke katahachim aro 2018 bilsini May jamangode ua an·tangko police-rangna bame on·eahachim.
Pattoko donako man·e jokpilani ja·mano ua Assam Kamrup a·jani Boko jolo donggipa Garojaan songo an·tangni jikgipa baksa dongengachim indiba Robibar attamo, ma·sina man·gijagipa manderang uni nokona re·bae uko silchidarerangchi goe galangaha ine Assam-ni police-rang u·iataha.
Rim·ako man·na skang ua A·chik National Cooperative Army (ANCA) bobil dolko bikote dingtang dingtang biaprango manderangko rim·gittange tangkarangko dabie ra·anio jak donggipa ong·achim aro adita bilsirangna skang Dalu-ona re·angenggipa police saksako goanioba jak donggipa ong·achim. Uni iandakgipa kamrangna police-rang uko baditaba chang pattoko donaha aro ua changgnide pattokoni joke katnaba man·aba man·ahachim.
Police-rangni u·iatani gitade, uni bame on·eani ja·mano police-rang, una nampilna gita agan-ku·pattianirangko aro pilak nanga dakchakanirangko on·aha indiba uni pattokoni jokpilaoni jagittammangni ja·manon uko ma·sina man·gijagipa manderang goe galangskaaha.
Get real time updates directly on your device, subscribe now.
Comments are closed.