TURA: A·chik Baptist Dal·gipa Krima (ABDK)-ni gitcham general secretary Reverend Krickwin C Marak, Mongolbar salo a·gilsakko watangaha.
Koborko on·ani gitade, ua batanggimin somoirangonin adita saanirangko man·engani gimin Tura-ni St Mary’s School sambao donggipa uni noktangon uko sanengachim. Mongolbar salo uni saanirang bilongbatahani gimin bakan uko Tura Civil Hospital-ona ra·angahachim indiba hospital-ona sokangon uko siaha ine doctor-rang parakataha.
West Garo Hills a·jani Deputy Commissioner Ram Singh-ni u·iatani gitade, ua COVID-19-koba man·ahachim aro uandaken ia bilsini gisepo West Garo Hills a·jao COVID-19-ko man·e sianggiparangoni Rev Marak, skanggipa ong·skaengaha.
A·gilsakko watanggipa Rev Krickwin Marak, ru·uta bilsirangnan ABDK-ni general secretary ong·e Nokgipa Isolna dangdike on·angaha aro ua Tura-o donggipa Harding Theological College-niba principal ong·angahachim.