TURA: Garo Hills Autonomous District Council (GHADC)-o kam ka·enggiparangna bilsi gittam ong·na sipile dormaharangko on·kujaengani gimin kam ka·enggiparang, kamtangtangko ka·gija jingjengatanirangko dakengon, Mongolbar saloba Non Gazetted Employees Association (NGEA)-ni dilgiparang, GHADC-ni gital executive committee baksa agangriktaiahachim indiba kam ka·enggiparangni dabianirangko chu·sokatna gita gital EC maming ku·rachakaniko on·na man·jahani gimin kam ka·giparang, an·tangtangni jingjengataniko dontongkujana tik ka·angskaaha.
NGEA-ni joint secretary Flaming B Marak-ni u·iatani gitade, gital Executive Committee baksa tom·e agangrikani somoio uamang, kam ka·giparangna uamangni man·na nangkuenggipa dormaharangko changsanon on·china aro GHADC-ni secretary Rikse R Marak-ko kamoniko ra·galchina dabie memorandum-ko on·angtaiahachim indiba uamangni dabianirangko chu·sokatna gita gital EC, maming ku·rachakanirangko on·na man·jaha.
“Chinga indita jarangna chakchike kamrangko ka·ahaoba uamang chingni dabianirangko knachakna gisiko nangteljaenga. Uni gimin chinga chingni dabianirangko chu·sokate on·kujaskal kamrangko ka·gija jingjengatangkugen,” ine NGEA-ni joint secretary parakataha.
NGEA-ni parakatani gitade, kam ka·giparangni kosako raka ja·kurangko de·gen ine ka·mikkenatenba, gital executive committee-ni dilgiparang, uamangko kam ka·piltaichina ge·etengachim.
GHADC-o kam ka·enggiparang re·anggipa January jaonin kamrangko dontongate jingjengatengani a·sel kajinarangko gilna man·jaengani gimin aro bang·bata kamrangan bon·chongdikengahani gimin kamtangtangona re·bapilchina aro kamtangtangko ka·taipilchina gita GHADC-ni gital executive committee, GHADC-o kam ka·enggiparangko didiatahachim ine nikna man·a.
Indake ong·engon, GHADC-ni gital executive committee baksa agangrikanio maming ku·rachakanirangko man·jahani gimin NGEA-ni dilgiparang suk ong·gijaniko parakatenba, uamangni dormaharangko on·ani bidingo a·dokni chief minister aro gital CEM, seachi ku·rachakaniko on·kujaskal uamang kamrangko ka·taipilkujawa aro jingjengatanirangko dontongkujawa ine parakatskaaha.
