SHILLONG: Manderangna COVID-19-ni tikarangko on·aniara ma·mong aro a·dok sorkari dolgnini daitoan ong·a ine Meghalaya a·dokni Health Minister AL Hek parakataha.
“Manderangna naljokaniko on·aniara ma·mong aro a·dok sorkari dolgnini daitoan ong·a aro manderangni janggiko chel·chakna chu·onga gita tikarangko man·e on·aniba chingni daitoan ong·a,” ine Sombar salo, a·dokni Health Minister, kobor ra·timgiparangna parakataha.
Indake ong·engon, bilsi 18 badegimin manderangko tika su·na gita a·dok sorkari, samrangni sokbaaniko sengengkua ine iana skang, a·dokni Deputy Chief Minister Prestone Tynsong parakatskaaha.
“Bilsi 18 badegimin manderangko tika su·na bimingrangko segatengaha aro tikarangko chinga ma·mong sorkari aro sam tarigipa company-oniko bi·atmanaha. Uamang samrangko on·atahaode chinga je somoioba tika su·aniko a·bachengatna man·gnok indiba da·o dipetde chinga samrangna sengengkua,” ine Tynsong parakataha.
Tikarangko breani giminde ma·mong sorkari baksasa agangrikna nanga ine Opposition dolni dilgipa Mukul Sangma-ni agangipa kattarangna aganchakaniko on·angengon, tikarangko on·anide ma·mong ba a·dok sorkarini jako ong·ja indiba samrangko tarigipa company-rangni jakosa ong·a indiba samrangko bon·changgija man·na gita sam tarigipa company-rangko didiatskachina ma·mong sorkariko mol·molatna man·gen ine Deputy Chief Minister parakataha.
Indake ong·engon, skanggipa chango manderang COVID-19-na mikrake donganiko watgalahani a·selsa da·o rang·san Meghalaya a·dokoba COVID-19 giproroengaha ine a·dokni Health Minister AL Hek parakataha.
Meghalaya a·doko da·o bang·bata manderangan simsakna a·bachengpiltaiengaha ineba Health Minister parakataha.