SHILLONG: Meghalaya Health Minister AL Hek-ni, Union Health Minister Dr Harsh Vardhan baksa agangrikatani ja·mano, a·dok pong 75,000 Covid tikarangko man·sodapaha. Indake ong·genchimoba, ia tikarangko bilsi 45 aro una batgipa manderangko su·na jakkalchenggen.
Iana skang mangmango A·dok, pong 42,000 sam bijirangko man·soaha ine aganengon, “Chingo pong 80,000 mangni gita sam bijirangko dongengkuachim, un baksana da·o pong 75,000 bijirangko man·sodapaha, iarang mikkang anti gni mangnade chu·onggnok, uni ja·mano bi·dapattaigen” ineba Health Minister AL Hek aganaha.
Bilsi 18-44 ong·gipa manderangko tika su·ani bidingo sing·anina aganchakengon, Pa Hek indake aganaha je bilsi 18+-rangko tika su·aniode on·tisa ja·manchakkugen, maina nangenggipa tikarangko man·sokuja.
Unaskang Deputy Chief Minister Prestone Tynsong-ba indake aganahachim je tikarangko man·soani ja·mano a·dok sorkari bilsi 18 gapgiparangoni tikarangko su·na a·bachenggnok.
Pa Tynsong-ni aganani gitade, tika su·na gita bilsi 18 gapgiparangoni uchi bilsi 44-ona biming segatanikode a·bachengataha tikarangko sokatbaani bidingo Ma·mong Sorkari aro Serum Institute of India baksaba agangrikataha.
Indake A·dokona Covid tika sokbaa joljolan Sorkari, bilsi 18 batgiparangko Covid tika su·aniko a·bachengataignok ineba Pa Tynsong aganaha.
Bilsi 18 batgiparangko, Covid tika suna nanggipa manderang Meghalayao lak 15-na baten donga, jenan sam bijirangko brena gita sorkarina kror 90 mang tangkarangko nanggen ine a·dok sorkari unaskang aganman·jokchim.
