SHILLONG: Meghalaya a·doko aro mongsongbate East Khasi Hills a·jao COVID-19 ta·rakbee giproroengahani gimin a·dok sorkari, East Khasi Hills a·jao Budbar attam 8:00 bajioni a·bachenge re·baenggipa May 10 tarik attamni 5:00 bajiona chu·gimik lockdown-ko ra·gatangaha.
Shillong-ni hospital-rango sabisi man·e dongenggiparang da·o 60 percent gapengahani gimin a·dok sorkari, East Khasi Hills a·jao chu·gimik lockdown-ko ra·gatangaha aro gipin a·jarangoba antini bon·ao lockdown-ko ra·gatskana manchiangaha ine Budbar salo, dingtang dingtang department-ni official-rang aro Cabinet minister-rang baksa tom·ani ja·man a·dokni Chief Minister Conrad K Sangma parakataha.
Chief Minister-ni parakatani gitade, Meghalaya a·doko COVID-19-ko man·e dongenggiparang da·o sak 2000 batengaha aro ian namen jajrengna nangani ong·engahani gimin East Khasi Hills a·jao chu·gimik lockdown-ko ra·gate gipin a·jarangoba antini bon·ao lockdown-ko ong·atskana tik ka·aha.
Dingtang dingtang cabinet minister-rang, dingtang dingtang a·jarangona re·ange obostarangko nienba, Sukrobar salo Shillong-ona re·angpile report-ko on·egen ineba Chief Minister parakataha.
Chief Minister-ni u·iatani gitade, Sonibar salo a·dok sorkari, obostarangko nipilna gita tom·aniko ong·attaigen aro nangani kri ja·kurangko de·angkugen.
Bristibar pringo a·dokni Chief Minister Conrad Sangma-ba Tura-ona re·bae West Garo Hills a·jao ong·enggipa obostarangko nipilangskagen.
May-ni 6 aro 7 tarikrango ong·atna tik ka·gimin board porikkarangni gimin janapatskaengon, ia porikkarangko May 11 aro 12 tarikrangona ra·doatskaaha ine Chief Minister parakataha.