TURA: Garo Hills Autonomous District Council (GHADC)-o kam ka·enggiparang, an·tangtangni dormaharangko man·tokkujaengani gimin kamrangko ka·gija jingjengatengani a·sel GHADC-o kajinarangko man·jaengani gimin aro pilak kamrangan bon·chongdikatako man·na nangengahani gimin salgittamni gisepon kamtangtangko ka·epilchina gita GHADC-ni gital Executive Committee (EC) ge·etaniko on·ataha.
Iani bidingo Non-Gazetted Employees Association (NGEA)-ni dilgiparangna seachi u·iatengon, GHADC office jolrangara mande jinmani biapsa ong·a aro ia biapo GHADC-ni permission gri aro Superintendent of Police (SP)-ni permission gri jingjengataniara niamni a·palo ong·enga ine GHADC-ni joint secretary parakatenba, jingjengataniko dontonge salgittamni gisepon kamtangtangko ka·epilchina gita ge·etaniko on·ataha.
District council-o kam ka·giparangde sorkario kam ka·giparang ong·jani gimin Indian Constitution-ni Article 309-o chel·chakako man·giparang ong·ja aro GHADC-o kam ka·giparangkoba maniteljagenchimode je somoioba executive committee, kamko bon·atna ba kamni kri dormaharangko on·skana bil dongaia ineba GHADC-ni joint secretary parakataha.
“Da·o dipet jingjengatenggipa employee-rangni kosako gital executive committee, maming raka ja·kurangko de·na miksonganirang dongkuja indiba GHADC-o ong·enggipa obostarangko ma·sichake jingjengatanirangko dontongjagenchimode, executive committee-ni gita jekoba dakna amaigen,” ine GHADC-ni joint secretary, NGEA-na mikrakataniko on·angaha.
GHADC-o kam ka·enggiparang an·tangtangni dormaharangko man·tokjaengani gimin an·tangtangni bilo pangchake jingjengatna man·a indiba GHADC-ni biapon officer-rangni re·ruraaniko champenge jingjengataniara niamni a·palo ong·enga ineba GHADC-ni joint secretary parakataha.
“GHADC-ni gital executive committee, GHADC-o ong·enggipa obostarangni bidingo aro tangka paisani gita neng·nikanirangko man·engani gimin na·simangna talate on·na jotton ka·aha indiba na·simang iako knachakna gisiko nangjaenga. GHADC-o ong·enggipa obostarang gital ong·ja aro ia neng·nikanirangko skangonin chagrongna nangbaenga aro ia neng·nikaniko an·ching jasa ba jagnini gisepode namatna man·jawa indiba na·simangni bakrimanichisa namatna man·gen. Na·simangni jabongana kam ka·gija dontongatanio GHADC-na bang·en noksan ong·na nangaha aro ia somoirango man·gipa kajinarangko kam ka·giparangni dormaharangko on·anio jakkalna man·gnokchim,” ineba GHADC-ni joint secretary parakataha.
Indake ong·engon, mikkangchi GHADC-o kam ka·enggiparang an·tangtangan neng·nikanirangko chagrongna nangjana gita salgittamni gisepon kamtangtangona re·bapile kamko ka·china gita GHADC-ni joint secretary u·iataha aro ia ge·etaniko manijagenchimode executive committee-ni gita rakgipa ja·kurangko de·na draatako man·naba gnang ine NGEA-na mikrakataniko on·angaha.