SHILLONG: Meghalaya a·doko ta·raken COVID-19 giproroaniko nikna man·engon, a·dok sorkarini gita sabisini giproroaniko champengna raken kamko ka·engoba mikkang antio COVID-19-ko man·giparang batangkunaba gnang ine mikrakataniko on·angaha.
Health department-ni Principal Secretary Sampath Kumar-ni parakatani gitade, manderang mikrake dongna gisik nangangjahaon pangnan unosa sabisirang ta·rakbate giproroa aro unode obostarangko champengna neng·ani ong·aha.
“Uni gimin an·chingo uandakgipa obosta ong·na nangkujaenga. Manderang jensalo re·ruraani aro jinma tom·anirang dongjawa unosa an·ching sabisi man·anikode komiatna man·aigen,” ine Kumar aganaha.
Re·anggipa April jamangonin Meghalaya a·doko ka·sine COVID giprorona a·bachengahachim aro uandaken da·o dikdiksani gisepon COVID man·giparang sak 1000 gapangahachim.
Da·o dipet East Khasi Hills a·jao COVID man·giparang sak 1300-na batengahani gimin Meghalaya a·doko bang·batgipa ong·engachim.
Sabisini giproroaniko champengani cholde dingtang dingtang biaprangko chipe donatanian ong·enga ine janapatengon, lockdown-ko ra·gatanichi sabisini giproroaniko aditade champengna man·gen ine Health official, an·tangni ka·dongchakenganiko parakataha.
Ia chango giproroenggipa COVID-19, namen batninggipa aro ta·rakbate batrikrikgipa ong·a ine talatangengon, manderangko mask ganjringchina aro an·tangtangna simsakchina Kumar didiataha.
Sabisini chinrangko man·ahaon, chi ding·ani bibarangko rang·sitrongchina, rang·sitani bewalrangko dake rorongchina aro chi ding·a ba juice, soup aro uandake namgipa cha·ani ringanirangko ranta ka·china Sampath Kumar didiataha.
Mikkang antio COVID man·giparang batkunaba gnang ine sorkari mikrakata
Date:
Share post:
