TURA: Sukrobar salo Meghalaya a·dokni Chief Minister Conrad K Sangma, Williamnagar-ona re·angenba, East Garo Hills a·ja gimiko COVID-19-ni giproroaniko champengna ja·ku de·anirangko nipilangaha.
COVID-19-ni giproroaniko nipilna gita tom·aniko ong·atanio East Garo Hills a·jani Deputy Commissioner Swapnil Tembe, Superintendent of Police (SP) BA Sangma baksana dingtang dingtang department-ni officer-rang, dingtang dingtang mondolini dilgiparang aro dingtang dingtang dolrangba bakko ra·angaha aro ia tom·anio a·dokni Chief Minister, jinmana aganprakengon, COVID-19-ni giproroaniko champengna gita ja·ku de·anio pilakkon bakrimchina didiangaha.
East Garo Hills a·jani dingtang dingtang hospital-rango COVID-19 man·gipa manderangko sanna gita mai dakgipa cholrang dongachim, badita ge palangrang donga aro badita oxygen-rang donga ukoba Chief Minister niangjolaha.
COVID-19 man·gipa biaprango nanga gita champengatanirangko dakchina aro tika su·ani program-ko bilakbate ong·atchina gitaba a·dokni Chief Minister, East Garo Hills district administration aro Health department-ni officer-rangko ge·etangaha.
East Garo Hills a·jao health care worker-rang aro frontline worker-rangoni 89.80 percent-de skanggipa tikako su·e ra·manaha ine parakatengon, a·jao songdongenggipa manderangko aro mongsongbate bilsi 45 badegimin manderangko ia COVID-ni tikarangko su·e ra·china gita Chief Minister didiangaha.
COVID-19-ko warachakna kamko ka·anio toromko dilgiparang aro jolko dilgiparangni bakrimaniko nangchongmota ineba Chief Minister, ia tom·anio dingtang dingtang toromni dilgiparangko aro dingtang dingtang song aro gittimni manderangkoba mittelpilangaha.