TURA: North Garo Hills police, batanggimin Bristibar pringo apsan a·jani PMGSY rama-sorok tarienggipa project-o kam ka·e cha·paenggipa sak gni, jemangan denggu dakgiparangni jako rim·gitangangako man·ahachim, uamangko maming saknaata grian mni Sukrobar attamo naljokataha aro denggu dakgiparang sak gittaman police-ni jako rim·a man·tokskaaha ine koborna u·iataha.
PMGSY-o kam ka·giparang sak gniko mni Bristibar pringni 3:30 am baji mango, ma·sina man·gijagipa sak gittam manderang matsramgipa silchi-darerang, jekai chakku, degal aro a·songtango tarigipa chandalrangko ra·bitangenba, uamangni tusia ma·sijamitingo camp-na napdraange gona su·na ka·mikkenatenba sak 2-ko rim·gittange ra·angahachim.
Ua bostara, North Garo Hills district-ni skotong songjinmaoni km 10 mang chel·ao donggipa Chidaret camp-o ong·angaha.
Denggu dakgipa sak gittam, rama project-o kam ka·e cha·paenggipa sakgni manderangko drae rim·gittange ra·angenba, apsan salo, saljatchini bako nokdangni manderangna ku·bilbat ka·e u·iatenba an·tangtangni rim·gittanganggipa manderangko watpilna gita sakprakna lak 5 gamskachina dabiahachim.
North Garo Hills-ni Superintendent of police, Abraham T Sangma-ni parakatani gitade, sakgni manderangko rim·gittangangako kobor man·soani joljolan uamangko naljokatna man·a gita am·sandianiko dakna a·bachengataha.
“Mni Sukrobar attam-o rim·gittanganggipa manderang bano dongenga uko ma·sina man·aha aro uni attamon denggu dakgipa manderangni jako rim·gittanganga man·giparang sakgniko Rongrong buring-bolgrimni rong·kolo dongnue donengako naljokatna man·aha.”
Uandake, denggu dakgipa sakgnikode uamangni dongnuchakramonikon rim·a man·aha aro saksagipaskakode mejal Sonibar salo gipin biaponiko rim·e ra·baskaaha. Uamangni ra·bitgipa chandalkoba police dol rim·chapaha ineba SP koborna parakataha.
Denggu dakgipa manderangara, batanggimin January 24 tariko North Garo Hill a·jani ning·ogipa Mendal sepang jolni Dingok bajalo Assam-oni bading-chiwalgipa manderangko daket dakgipa apsan manderangchim ine police-rang u·ina man·aha.
Police-rangni jako rim·a man·gipa sak 3 denggu dakgiparangara, PO Raja Apal & PS Bajengdoba sepango donggipa Nengsa Apal songni bilsi 36 ong·gipa Rupen R Marak aro bilsi 20-ni Danseng G Momin, aro apsan a·jani Sanima songni bilsi 15-san ong·kuenggipa chadambe saksa ong·a, jean saksade bilsokkujagipa ong·engachim.
Uamang sak gittam manderangara, batanggimin changoba pattoko donatako man·giparangan ong·achim, indiba uamang jamin watako man·tokaha aro uamang apsandakgipa niam gri kamrangko ka·na a·bachengtaikuenga ineba koboro janapaha.
