SHILLONG: A·dokni hospitalrango COVID-19 sagiparangko sanna gita tuchakani a·damrang chu·ongangjaengahani gimin, sak 100 tuchakani a·dam gnanggipa hospitalrangko damgni rikgitikna gita A·dok Sorkari chanchiaha.
Skanggipa sak 100 tuchakna man·gipa hospital tambuko Pasteur Institute, Lawmali sepango rikgen, uni ja·man gnigipa hospitalko ISBT campus, Mawlai Mawiong-o rikgen.
Robibaro official koboro parakatani gitade, ia damgni hospitalrangko rikgitikna gita Sonibaro chugipa gadangni tom·anio chanchie tik ka·angaha.
Official koborrango gita ia damgni hospital tamburangko sal 28-ni gisepo rike matchotatgen.
Sing·anirangna aganchakengon, ia damgni hospitalrangko rikanio ge·prakna kror 2.5 mang tangkarangko nanggen ine aganaha.
Indakgipa hospitalrangko jikjakani, wal·ku, a·dimu, senga soboka grigipa biaprango rikgen.
