TURA: Meghalaya a·doko aro mongsongbate West Garo Hills a·jaoba COVID-19-ko man·giparang ta·raken batrorobaengani gimin Garo Hills-ni gipin biaprangona giproroangjana gita May 10 tarikoni re·baenggipa May 17 tarikona dingtang dingtang niamrangko ra·gatangaha ine West Garo Hills a·jani Deputy Commissioner u·iataha.
Deputy Commissioner-ni u·iatani gitade, ia salrango West Garo Hills a·jani ning·o donggipa pilak skul, college, training institute aro uandakgipa skie on·chakram biaprangko chipe donangkugen indiba ia salrango internet gita class-rangko ra·skana man·gen.
Ia salrango toromni gita, songsalni gita ba uandake jinma tom·anirangko ong·atna man·jawa indiba mande siani aro bia ka·anirangode DC office-oniko permission ra·chengenba sak 15-na batgija tom·na man·gen.
Ia salrango gipin a·dok ba biaprangoni manderang napbana man·kujawa aro pilak tourist spot-rang baksana border haat aro antio changprak kuligipa bazar-rangkoba chipe donangkugen.
Nangchongmotgipa kamrangko ka·enggipa office-rangna agrede ia salrango pilak private office-rangkoba chipe donangkugen aro central government-ni office-rangkoba chipe manderang noktangtangoni kamrangko ka·skana man·gen ine DC u·iataha.
Manderangko salruragipa garirangna dongimin niamrangni gimin janapatengon, a·bachengo District Transport Officer-ni u·iatgimin gita manderangko bakbrioni baksana bate gatna man·jawa ine DC u·iataha.
Ia salrango DC office-ni on·gimin pass-rangko man·e nangchongmota kamrangna re·ruraenggiparangna agrede a·dok damsaoni damgipinona aro a·ja damsaoni damgipinona re·rurana man·jawa ineba DC u·iataha.
Manderangni nangchongmotgipa bosturangko palenggipa dokkanrangko Tura Municipal Board-ni dongimin niam gita pring 8:00 bajioni attam 5:00 bajiona kulina man·gen. Hardware, electrical, computer service, mobile tarigipa, gari tarigipa aro uandakgipa dokkanrangko pring 8:00 bajioni attam 5:00 bajiona kulina on·gen indiba nangchongmota ong·gijagipa dokkanrangkode Sombar, Budbar aro Sukrobar salrango pring 8:00 bajioni salni 12:00 bajiona kuliskana man·gen ine DC u·iataha.
Kam nangchongmotana nokoni ong·katengon, mask-rangko ganjringchina, saksa sakgipinoni chel·tangrike dongchina aro rongtal an·talaniko rakkichina gitaba DC u·iataha.
Mande jinmani biaprango aro kam ka·chakram biaprango skatang stujachina aro ta·makkurangko jakkaljachina gitaba DC mikrakataniko on·angaha.
Sorkarini dongimin niamrangko pe·genchimode Epidemic Disease Act 1897-ni Section 2-ni ning·o on·gimin bilrango pangchake dongimin officer-rang, ja·kurangko de·anggen ineba DC mikrakataha.
Curfew-ni somoio police-rang, fire & emergency service, medical, MeECL, PHE, PWD, Press aro uandake nangchongmotgipa kamrangko ka·enggipa dolrangkode champengani dongjawa ine DC u·iataha.