TURA: Meghalaya a·doko aro mongsongbate East Garo Hills a·jaoba COVID-19 ta·raken giproroengani gimin sabisini giproroaniko champengna gita East Garo Hills a·jani District Magistrate Swapnil Tembe, dingtang dingtang niamrangko ra·gate on·angaha.
Deputy Commissioner-ni u·iatani gitade, East Garo Hills a·jani ning·o donggipa skul aro college-rangko re·baenggipa May 20 tarikona chipe donangkugen indiba skul aro college-rangko chipe donengmiting somoio internet gita class-rangko ra·skana man·gen.
Walni curfew-ko walantian 10:00 bajioni pring 5:00 bajiona ra·gatangkugen indiba ian sipai dolrangna, medical-ni manderangna aro nangchongmotgipa bosturangko salbaenggipa garirangnade maming nangchakeani dongjawa ine DC u·iataha.
East Garo Hills a·ja gimikon dokkanrangkoba attam 7:00 bajion chiptokna nanggen.
Antini bon·angachibara lockdown-ko ra·gatengani gimin May 14 tarik walni 10:00 bajioni May 17 tarik pring 5:00 bajiona East Garo Hills a·jaoba chu·gimik lockdown-ko ra·gatangtaigen.
Antio changprak kuligipa bazar antirango me·su samjak aro bolam biterangna agrede palna sim·na man·jawa.
Olakkiram nokrangkoba chipe donangkugen aro da·o dipet East Garo Hills a·ja gimikon toromni gita, songsalni gita ba uandake jinma tom·anirangko ong·atna man·kujawa. Mande sia aro bia ka·anirangode Deputy Commissioner-oniko permission ra·chengenba sak 30-na bate tom·na man·skajawa ine DC u·iataha.
Da·o dipet gipin a·dokrangoni darangba East Garo Hills a·jaona napbana man·jawa aro tourist spot ba manderangni rochakgipa biaprangkoba chipe donangkugen.
East Garo Hills a·ja gimikon da·o dipet kal·susaanirangkoba ong·atna man·kujawa ine u·iataha.
Kam nangchongmotana nokoni ong·katengon, mask-rangko ganjringchina, saksa sakgipinoni chel·tangrike dongchina aro rongtal an·talaniko rakkichina gitaba DC u·iataha.
Mande jinmani biaprango aro kam ka·chakram biaprango skatang stujachina aro ta·makkurangko jakkaljachina gitaba DC mikrakataniko on·angaha.
Sorkarini dongimin niamrangko pe·genchimode Epidemic Disease Act 1897-ni Section 2-ni ning·o on·gimin bilrango pangchake dongimin officer-rang, ja·kurangko de·anggen ineba DC mikrakataha.