TURA: Garo Hills Autonomous District Council (GHADC)-o kam ka·enggiparang bilsi gittam ong·na sipile dormaharangko man·tokkujaengani gimin kamrangko ka·gija jingjengattokengon, salgittamni gisepo kamtangtangko ka·piltaijagenchimode rakgipa ja·kurangko de·naba gnang ine executive committee mikrakataniko on·ahani gimin, kam ka·giparangoni saksakoba kamoniko ra·galgenchimode Garo Hills gimik jingjengatanirangko dakanggen ine GSU, AYWO aro FAF dolrang mikrakataniko on·angskaaha.
Dolgittam NGO-rangni parakatani gitade, GHADC-o kam ka·enggiparang an·tangtangni man·na nangkuenggipa dormaharangko man·jaengani giminsa kamrangko ka·gija jingjengattokenga aro kam ka·giparangko executive committee-ni ka·mikkenataniara namen kragijani ong·engachim.
Indita jarangni dormaharangko man·jagenchimoba GHADC-o kam ka·enggiparang chakchike kamrangko ka·aha ineba NGO-rang, kam ka·giparangko mittelpilangaha.
“GHADC-o kam ka·enggiparangba an·tangtangni nokdangrangko aldu mittangna aro dedrangni skul fee-rangko gamna nanga indiba indita jarangni dormaharangko man·jae uamang nokdangtangtangko chalaianio baditan neng·nikanirangko chagrongna nangtokenggen. Kam ka·giparangoni mitamrang hospital-rangni bill-rangko gamna man·jae aro sanna bananirangko ra·na man·jae mitamrangde janggirangko gimaatpilna nangaha,” ine NGO-rang, suk ong·gijaniko parakataha.
NGO-rangni parakatani gitade, GHADC-o kam ka·giparang an·tangtangni jingjengataniko dontongkujana tik ka·ahaoba GHADC-kode kulina on·enga aro officer-rangkoba kam ka·na on·enga ine NGEA-ni dilgiparangan aganmanahachim.
GHADC-o kam ka·enggiparangoni bang·batan A·chikrangsa ong·a ine janapatengon, kam ka·giparangoni saksakomangba kamoniko ra·galgenchimode Garo Hills gimik jingjengatangskagen ine NGO-rang mikrakataniko on·angaha.
“Ia bilsini GHADC election-o chingni bak ra·gijaniara district council election-o gipin jatrangni bak ra·paaniko jegalani aro dingtang electoral roll-ko tarichina dabianisan ong·aija indiba GHADC-o kam ka·giparangni man·na nangkuenggipa dormaharangko on·china dabianiba ong·achim,” ine dolgittam NGO-rang parakatenba, kam ka·giparangko sinjetna jotton ka·ani pal, dormaharangko on·na aro kamrangko nambatatna gita cholrangko sandichina gita GHADC-ni executive committee-ko didiangaha.