TURA: Garo Hills Autonomous District Council (GHADC)-ni chief executive membor (CEM) Benedic R Marak-ni dilanichi gital executive committee, Sombar salo Non Gazetted Employees Association (NGEA)-ni dilgiparangko gronge jingjengataniko ra·gale kamrangko ka·piltaichina mol·molahaoba jingjengataniko ra·galpilna jechakaha.
Sombar salo, GHADC-ni CEM Benedic Marak, NGEA-ni dilgiparangko an·tangni office-ona okamatenba, GHADC-o ong·enggipa obostarangni gimin talate on·na aro jingjengataniko ra·galpilchina didiahachim indiba NGEA-ni dilgiparang jingjengataniko ra·galpilna jechaktokaha.
Jingjengataniko ra·gale Mongolbar sal dipet kamrangko ka·taipilchina GHADC-ni CEM, NGEA-ni dilgiparangko didiahachim indiba GHADC-o kam ka·giparang jingjengataniko ra·galna gita jechaktokaha.
GHADC-o kamrangko ka·gija da·o jabri batangpilengahani a·sel tangka paisani gita neng·nikanirangko man·engaha ineba GHADC-ni CEM, NGEA-ni dilgiparangna talate on·na jotton ka·ahachim indiba GHADC-o kam ka·giparang, an·tangtangni dabianiko chu·sokate on·jaskal kamrangko ka·piltaina jechaktokaha.
A·dok sorkarini dakchakanichi, kam ka·giparangna jabongani dormaharangko on·na gita tangka paisarangko chimongna man·aha indiba kamrangko ka·piltaie dormahani nanggipa lekkarangko tarimanosa tangka paisarangko watatgen ineba Marak, NGEA-ni dilgiparangna talate on·ahachim indiba GHADC-o kam ka·giparangna komibeoba bilsisani dormaharangko gital pay scale-o on·genchimosa GHADC-o kam ka·giparang jingjengatanirangko dontonge kamko ka·piltaigen ine NGEA-ni dilgiparang paraktokskaaha.
GHADC-o kam ka·enggiparang bilsi gittam ong·na sipile dormaharangko man·kujaengani gimin kamrangko ka·gija jingjengattokengachim ine nikna man·a.
Indake ong·engon, kam ka·giparangna gital executive committee, jabongani dormaharangko on·na ku·rachakahachim indiba kam ka·giparang jabongani dormahakode ra·chakna jechaktokskaaha aro komibeoba bilsisani dormahako gital pay scale-o on·china dabitokskaaha.