TURA: Kamtangoniko watchina mol·mole, Garo Hills Autonomous District Council (GHADC)-ni Secretary Rikse R Marak, Meghalaya a·dokni Chief Minister Conrad K Sangma-na sedoataha.
Koborko on·ani gitade, re·anggipa Sukrobar salon, GHADC-ni Secretary aro a·dokni civil service officer Rikse R Marak, secretary-ni kamoniko watchina Chief Minister-na mol·mole segimin chittiko, GHADC-ni chief executive membor-ni jako on·ataha.
Re·anggipa December jaoba Marak, kamtangoniko watchina mol·mole a·dok sorkarina sedoatahachim aro uandaken da·o ua gnigipa changna sedoattaiaha.
Secretary-ni kamo suk ong·niktokjaenba GHADC-o kam ka·enggiparang aro mongsongbate Non-Gazetted Employees Association (NGEA), Marak-ko kamoniko ra·galchina dabitokskaengachim ine nikna man·a.
GHADC-o kam ka·enggiparang bilsi gittam ong·na sipile dormaharangko man·kujaengani gimin aro secretary-ko kamoniko ra·galjaengani gimin kamrangko ka·gija jingjengattokengachim.
Kamtangoniko watchina chief minister-na sedoatgipani bidingo sing·sandiaton, ua an·tangni man·a gita GHADC-na dangdike on·aha aro da·o kamtangoniko watchina nangnikengaha ine GHADC-ni secretary Rikse R Marak parakataha.
“Anga an·tangni bil ama gita GHADC-na dangdike on·aha aro man·a dipet namdapataniko ra·bana jotton ka·aha. Anga bilsignina GHADC-ni Secretary ong·e kamko ka·aha aro da·o gipinrang angni biapko ra·rikskachinaha,” ine Marak parakataha.
